”ஆளுக்கு ஒன்னு”…. தவெகவை வீழ்த்த திமுக – அதிமுக போட்ட ரகசிய டீல்?…. விஜய்க்கு மாபெரும் செக்… வெளியான பரபரப்பு தகவல்….!

தமிழ்நாட்டில் அறிவிக்கப்பட்டுள்ள தாராபுரம் மற்றும் மதுராந்தகம் சட்டமன்றத் தொகுதி இடைத்தேர்தல், மாநில அரசியலில் ஒரு சுவாரசியமான திருப்பத்தை ஏற்படுத்தியுள்ளது. முன்னாள் அதிமுக சட்டமன்ற உறுப்பினர்களான சத்யபாமா மற்றும் மரகதம் குமரவேல் ஆகியோர் தங்களது பதவிகளை ராஜினாமா செய்துவிட்டு ஆளுங்கட்சியான தவெகவில் இணைந்ததால், இந்த இடைத்தேர்தல் இரு கட்சிகளுக்குமே கௌரவப் பிரச்சினையாக மாறியுள்ளது. வெளியில் ஐந்து முனைப் போட்டி நிலவுவது போலத் தோன்றினாலும், கள நிலவரத்தில் எதிர்க்கட்சிகளான திமுக மற்றும் அதிமுக ஆகியவை திரைமறைவில் ஒரு புதிய வியூகத்தைக் கையாண்டு வருவதாக அரசியல் வட்டாரங்கள் தெரிவிக்கின்றன.

பொதுத்தேர்தலில் இந்த இரு தொகுதிகளையும் அதிமுகவே கைப்பற்றியிருந்த நிலையில், தங்களது பதவியை விட்டு விலகி தவெக சார்பில் மீண்டும் போட்டியிடும் வேட்பாளர்களுக்குப் பாடம் புகட்ட வேண்டும் என்பதில் எடப்பாடி பழனிசாமி தீவிரமாக உள்ளார். அதேவேளையில், ஆளுங்கட்சியான தவெகவின் சட்டமன்ற பலம் மேலும் அதிகரிப்பதைத் தடுக்க வேண்டும் என்பதில் திமுகவும் உறுதியாக உள்ளது. இதனால் எதிரெதிர் துருவங்களாக நின்று வாக்குகளைப் பிரித்து தவெகவின் வெற்றிக்கு வழிவகுப்பதை விட, “ஆளுக்கு ஒன்று” என்ற முறையில் தங்களுக்குள் விட்டுக்கொடுத்து பொது எதிரியான தவெகவை வீழ்த்த இரு கட்சிகளும் மறைமுக உடன்பாட்டிற்கு வந்துள்ளதாகக் கூறப்படுகிறது.

தாராபுரம் தொகுதியைப் பொறுத்தவரை, அதிமுக அங்குத் தனது முழுக் கவனத்தையும் செலுத்தி வருகிறது. கொங்கு வேளாளர் கவுண்டர் சமூக வாக்குகளை முழுமையாகத் தங்கள் பக்கம் ஈர்ப்பதோடு, அருந்ததியர் மற்றும் முதலியார் சமூக வாக்குகளையும் ஒருங்கிணைத்து அமோக வெற்றி பெற அதிமுக வியூகம் அமைத்துள்ளது. கொங்கு மண்டலம் எப்போதும் அதிமுகவின் கோட்டைதான் என்பதை நிரூபிக்க அக்கட்சி இங்குத் தீவிரமாக வேலை செய்து வரும் அதேவேளையில், வழக்கமாகத் தங்களுக்குச் சாதகமில்லாத தொகுதி என்பதால் திமுக இங்குப் பெரிய அளவில் களப்பணியாற்றாமல் அமைதி காப்பதாகக் கூறப்படுகிறது.

மறுபுறம், தலைநகர் சென்னைக்கு அருகாமையில் உள்ள மதுராந்தகம் தொகுதியை திமுக தனது முதன்மை இலக்காகக் கொண்டுள்ளது. திமுக இளைஞரணிச் செயலாளர் உதயநிதி ஸ்டாலின் தலைமையில் அக்கட்சியின் முக்கிய நிர்வாகிகள் அனைவரும் இங்கு முகமிட்டுத் தீவிரப் பரப்புரையில் ஈடுபட்டு வருகின்றனர். அதிமுகவின் மறைமுக ஆதரவும் தங்களுக்குச் சாதகமாக இருக்கும் என்ற நம்பிக்கையில் திமுக தொண்டர்கள் உற்சாகமாகக் களப்பணியாற்றி வருகிறார்கள். அதேசமயம், அதிமுக இங்குப் பெயரளவிற்கே தேர்தல் பணிகளை முன்னெடுப்பதாகத் தகவல்கள் தெரிவிக்கின்றன.

திமுக மற்றும் அதிமுகவின் இந்த அனுபவமிக்கத் தேர்தல் கணக்குகளைச் சமாளித்து, இரண்டு தொகுதிகளிலுமே வெற்றி பெற வேண்டிய கட்டாயத்தில் தவெக இருக்கிறது. இரண்டு தொகுதிகளிலும் தவெக நிர்வாகிகள் தீவிர வாக்கு சேகரிப்பில் ஈடுபட்டு வந்தாலும், போட்டி கடுமையாக இருப்பதால் முதலமைச்சர் விஜயின் நேரடிப் பரப்புரை மட்டுமே சூழலைத் தங்களுக்குச் சாதகமாக மாற்றும் என அவர்கள் நம்புகின்றனர். முதலமைச்சர் விஜய் இரு தொகுதிகளிலும் தலா இரண்டு நாட்கள் தீவிரப் பிரச்சாரம் மேற்கொள்ளத் திட்டமிட்டுள்ள நிலையில், எதிர்க்கட்சிகளின் மறைமுக கூட்டணி வியூகம் பலிக்குமா அல்லது விஜயின் பிரசார வியூகம் தவெகவிற்கு வெற்றியைத் தேடித்தருமா என்பது வரும் அக்டோபர் 9-ஆம் தேதி தேர்தல் முடிவுகளில் தெரியவரும்.