ஹைதராபாத்தில் உள்ள பலக்னுமா காவல் எல்லைக்குட்பட்ட பகுதியில், தன் வீட்டிற்குள் அமர்ந்திருந்த முகமது ஜியாவுதீன் என்பவரை அவரது உறவினர் கத்தியால் தாக்கியதாகக் கூறப்படுகிறது. இந்த தாக்குதலின் போது தன் கழுத்தை நோக்கி வந்த கத்தியைத் தடுக்க முயன்றதில், ஜியாவுதீனின் இரண்டு கைகளிலும் வெட்டுக் காயங்கள் ஏற்பட்டுள்ளன. தன் உறவினர் தன்னைக் கொலை செய்யவே முயன்றதாக அவர் குற்றம் சாட்டியுள்ளார்.
தாக்குதலுக்கு உள்ளான ஜியாவுதீன் உடனடியாக உஸ்மானியா பொது மருத்துவமனைக்குக் கொண்டு செல்லப்பட்டு மருத்துவப் பரிசோதனைக்கு உட்படுத்தப்பட்டார். முதற்கட்ட விசாரணையில் அவரது இரு கைகளிலும் கத்தி காயங்கள் இருப்பது உறுதி செய்யப்பட்டுள்ளது. தற்போது தான் பாதுகாப்பாக இருப்பதாகக் கூறியுள்ள அவர், காவல் துறையினரிடம் இது தொடர்பான வாக்குமூலத்தையும் அளித்துள்ளார்.
இச்சம்பவம் தொடர்பான சிசிடிவி காட்சிகள் வெளியாகி உள்ள நிலையில், அதை வைத்து காவல் துறையினர் தீவிர விசாரணை மேற்கொண்டு வருகின்றனர். தாக்குதலுக்கான பின்னணி, காரணம் மற்றும் குற்றவாளியின் அடையாளம் குறித்து அதிகாரப்பூர்வ தகவல்கள் இன்னும் வெளியாகவில்லை. பலக்னுமா போலிசார் வழக்கின் சட்டப் பிரிவுகளை விரைவில் அறிவிப்பார்கள் என எதிர்பார்க்கப்படுகிறது.