ஆந்திரப் மாநிலம் ஓய்.எஸ்.ஆர் கடப்பா மாவட்டம் புலிவெந்துலாவில் உள்ள கால்நடை பராமரிப்புத் துறையில் பணிபுரியும் பெண் ஒருவர், வேம்பள்ளி மண்டலத்தைச் சேர்ந்த பிரசாத் என்பவரைக் காதலித்துத் திருமணம் செய்ய ஒப்புக்கொண்டார். திருமணத்திற்காக பிரசாத்தின் குடும்பத்தினர் பந்தல் அமைத்து, ஊருக்கே விருந்து வைத்து, ரூ.1.5 லட்சத்திற்குத் துணிகள் எடுத்துத் தீவிரமாக ஏற்பாடுகளைச் செய்தனர்.
ஆனால், திருமண முகூர்த்த நாளில் மணப்பெண் மண்டபத்திற்கு வரவில்லை. பதற்றமடைந்த பிரசாத்தின் குடும்பத்தினர் போன் செய்தபோது, “உன்னைத் திருமணம் செய்து கொண்டால் என் அம்மா இறந்துவிடுவார், சாரி” என்று மெசேஜ் அனுப்பிவிட்டு போனை சுவிட்ச் ஆஃப் செய்துள்ளார். இதனால் அதிர்ச்சியடைந்த பிரசாத், தான் ரூ.10 லட்சம் வரை செலவு செய்து ஏமாந்ததாகக் காவல் நிலையத்தில் புகார் அளித்தார். விசாரணையில், அப்பெண் ஏற்கனவே இரண்டு பேரை இதேபோலத் திருமணம் செய்து பணம் பறித்த மோசடிப் பேர்வழி என்பது தெரியவந்தது. போலிஸார் இதுகுறித்துத் தீவிர விசாரணை நடத்தி வருகின்றனர்.