“அமைச்சரவையில் 2 பிராமணர்கள்”… விஜய் எடுத்த அந்த ஒரு முடிவு… இணையத்தில் வெடித்த சாதிரீதியான விவாதம்… இயக்குனர் திருச்செல்வம் ஓப்பன் டாக்…!

தமிழக வெற்றிக் கழகத்தின் தலைவர் விஜய் முதலமைச்சராகப் பொறுப்பேற்றது முதல், அவர் எடுக்கும் ஒவ்வொரு முடிவும் தமிழக அரசியல் களத்தில் பெரும் அதிர்வலைகளை ஏற்படுத்தி வருகிறது. குறிப்பாக, அண்மையில் வெளியான அவரது அமைச்சரவை பட்டியல் சமூக வலைதளங்களில் ஆதரவும் விமர்சனமுமாகத் தீவிர விவாதப் பொருளாக மாறியுள்ளது. அனைத்துச் சமூகங்களுக்கும் பிரதிநிதித்துவம் அளிக்கும் வகையில் இந்த அமைச்சரவை அமைந்துள்ளதாக ஒருதரப்பு பாராட்டினாலும், “இரண்டு பிராமணர்களுக்கு அமைச்சர் பதவி ஏன், அதிலும் ஒருவருக்கு அறநிலையத்துறை ஒதுக்கப்பட்டது ஏன்?” என்ற கேள்விகள் சில அரசியல் வட்டாரங்களில் எழுப்பப்பட்டு வருகின்றன.

இந்த விமர்சனங்களுக்குத் தொலைக்காட்சித் தொடர் இயக்குநரும் நடிகருமான திருச்செல்வம் தனது ‘தினமும் அரசியல் பழகுவோம்’ வீடியோ பதிவின் மூலம் அதிரடியான பதிலை அளித்துள்ளார். விஜய்யின் அரசியல் நகர்வுகளுக்குத் தொடர்ந்து ஆதரவளித்து வரும் அவர், “ஜெயலலிதா அம்மையாரைச் சமூக நீதி காத்த வீராங்கனை என்று நாம் கொண்டாடினோம், அவரும் பிராமண சமூகத்தைச் சேர்ந்தவர்தானே? அவரை நம்பிய நம்மால், விஜய்யின் அமைச்சரவையில் உள்ளவர்களையும் நம்ப முடியும்; மனிதர்களாக நாம் நல்லதை நினைப்போம்” என்று தற்போதைய விமர்சகர்களுக்குப் பதிலடி கொடுத்துள்ளார். சமூகச் சமநிலையைப் பேணவே விஜய் இந்த முடிவை எடுத்துள்ளார் என்ற திருச்செல்வத்தின் கருத்து தற்போது இணையத்தில் வைரலாகி வருகிறது.

இதே விவகாரம் குறித்துப் புதிய அமைச்சரவையில் இடம்பெற்றுள்ள அமைச்சர் ஆதவ் அர்ஜுனா பேசுகையில், எதிர்க்கட்சிகளின் சாதிய ரீதியிலான பிரச்சாரங்களுக்கு முற்றுப்புள்ளி வைத்துள்ளார். அறநிலையத்துறை அமைச்சராக நியமிக்கப்பட்டுள்ள ரமேஷை அமைச்சராக்கும் வரை, அவர் என்ன சாதி என்றே தங்களுக்குத் தெரியாது என அவர் விளக்கம் அளித்துள்ளார். திறமையின் அடிப்படையிலேயே பதவிகள் வழங்கப்பட்டுள்ளன என்பதை உணர்த்தும் வகையில் அமைந்துள்ள அவரது இந்த விளக்கம், எதிர்க்கட்சிகளின் விமர்சனங்களை ஓரளவுக்குத் தணிக்கும் வகையில் அமைந்துள்ளது.

சினிமாவில் இருந்து அரசியல் களம் புகுந்து, முதல் தேர்தலிலேயே களம் கண்டு இன்று முதலமைச்சர் நாற்காலியில் அமர்ந்திருக்கும் விஜய், ஆரம்பத்திலிருந்தே அதிரடி முடிவுகளை எடுத்து வருகிறார். சாதி, மதங்களைக் கடந்து திறமைக்கும் சமூகச் சமநிலைக்கும் முக்கியத்துவம் அளிக்கும் இவருடைய இந்த அமைச்சரவை தேர்வு, தமிழக அரசியலில் ஒரு புதிய மாற்றத்திற்கான தொடக்கமா அல்லது வழக்கமான அரசியல் சமரசமா என்ற விவாதம் மக்கள் மத்தியில் தொடர்ந்து நீடித்துக் கொண்டே இருக்கிறது.