தமிழக அரசியலில் பரபரப்பு…. திமுக – பாஜக ரகசியக் கூட்டணி?…. டெல்லியில் நடக்கும் திரைமறைவு நாடகம்.. பின்னணியில் இருக்கும் அந்த ஒரு காரணம்…!

தமிழக அரசியலில் ஏற்பட்டுள்ள அதிரடி மாற்றங்கள், தேசிய அளவிலான அரசியல் நகர்வுகளில் பெரும் தாக்கத்தை ஏற்படுத்தத் தொடங்கியுள்ளன. சமீபத்தில் நடந்து முடிந்த தமிழக சட்டமன்றத் தேர்தலில் ஆளுங்கட்சியான திமுக தோல்வியடைந்து, தமிழக வெற்றிக் கழகத்தின் (தவெக) தலைவர் விஜய் முதலமைச்சராகப் பொறுப்பேற்றுள்ளார். இந்த தேர்தல் முடிவுக்குப் பின், திமுக கூட்டணியில் இருந்த காங்கிரஸ், விசிக, இந்தியன் யூனியன் முஸ்லிம் லீக் மற்றும் இரு கம்யூனிஸ்ட் கட்சிகள் என 5 முக்கியக் கட்சிகள் தவெக கூட்டணிக்குத் தங்களது ஆதரவை மாற்றியுள்ளன. இதில் காங்கிரஸ், விசிக, முஸ்லிம் லீக் ஆகிய கட்சிகள் புதிய அமைச்சரவையிலும் பங்கெடுத்துள்ளன. இத்தகைய சூழலில், முக்கியக் கூட்டணிக் கட்சிகளை இழந்து திமுக பின்னடைவைச் சந்தித்துள்ள நிலையில், இந்த வாய்ப்பைப் பயன்படுத்தி திமுகவின் ஆதரவைப் பெற பாஜக திரைமறைவு முயற்சிகளில் இறங்கியுள்ளது அரசியல் வட்டாரத்தில் பரபரப்பைக் கிளப்பியுள்ளது.

திடீரென மாறியுள்ள இந்த அரசியல் சூழலுக்குப் பின்னணியில், மத்திய பாஜக அரசுக்கு நாடாளுமன்றத்தில் உள்ள ஒரு முக்கியத் தேவைதான் காரணம் என்று கூறப்படுகிறது. கடந்த ஏப்ரல் மாதம் லோக்சபாவில் கொண்டு வரப்பட்ட 33 சதவீத மகளிர் இடஒதுக்கீடு மற்றும் தொகுதி மறுவரையறை (Delimitation) ஆகிய இரண்டு முக்கிய அரசியலமைப்பு சட்டத்திருத்த மசோதாக்களும் ஆளும் பாஜக கூட்டணிக்குத் தேவையான 3ல் 2 பங்கு எம்பிக்களின் (360 எம்பிக்கள்) ஆதரவு இல்லாததால் தோற்கடிக்கப்பட்டன. தற்போது பாஜக கூட்டணிக்கு 293 எம்பிக்கள் மட்டுமே உள்ள நிலையில், வரும் ஜூலை மாதம் நடைபெறவள்ள நாடாளுமன்ற மழைக்கால கூட்டத்தொடரில் இந்த மசோதாக்களை மீண்டும் நிறைவேற்ற மத்திய அரசு திட்டமிட்டு வருகிறது. இதற்காகவே, நாடாளுமன்றத்தில் 22 எம்பிக்களைக் கொண்டுள்ள திமுகவின் ஆதரவை நாடி பாஜக காய்நகர்த்தி வருகிறது.

காங்கிரஸ் உள்ளிட்ட கட்சிகள் தவெக பக்கம் சாய்ந்ததால் அதிருப்தியில் உள்ள திமுக, சமீபத்தில் டெல்லியில் நடந்த ‘இந்தியா’ கூட்டணிக் கட்சிகளின் ஆலோசனைக் கூட்டத்தைப் புறக்கணித்துள்ளது. இதனைத் தங்களுக்குச் சாதகமாக்கிக் கொள்ள நினைக்கும் பாஜக மேலிடம், நாடாளுமன்றத்தில் தங்களது சட்டத்திருத்த மசோதாவிற்கு நிபந்தனையுடனான ஆதரவை வழங்குமாறு திமுகவிடம் பேச்சுவார்த்தை நடத்தி வருவதாகத் தகவல்கள் வெளியாகியுள்ளன. தவெக கூட்டணியில் இணைந்துள்ள 5 கட்சிகளும் பாஜகவை மிகக் கடுமையாக எதிர்க்கும் கொள்கை உடையவை என்பதால், தற்போது சிறிய கட்சிகளுடன் தனித்துக் காணப்படும் திமுகவிற்குப் புதிய அரசியல் கணக்குகளை உருவாக்க வேண்டிய கட்டாயம் ஏற்பட்டுள்ளது. ஒருவேளை திமுகவின் 22 எம்பிக்களின் ஆதரவு கிடைத்தால், பாஜகவிற்கு மசோதாவை நிறைவேற்றத் தேவையான பலம் எளிதாகக் கிடைத்துவிடும்.

இருப்பினும், கொள்கை ரீதியாக முற்றிலும் மாறுபட்ட பாஜகவுடன் திமுக கைகோர்க்குமா? என்பது இப்போது மில்லியன் டாலர் கேள்வியாக உருவெடுத்துள்ளது. தமிழகத்தில் தவெகவின் அசுர வளர்ச்சியை எதிர்கொள்ளவும், இழந்த அரசியல் செல்வாக்கை மீட்டெடுக்கவும் திமுக மத்திய பாஜக அரசின் ஆதரவை நாடக்கூடும் என்று ஒரு தரப்பினரால் கணிக்கப்பட்டாலும், இது திமுகவின் பாரம்பரியமிக்க மதச்சார்பற்ற கொள்கை அடையாளத்திற்குப் பெரும் சவாலாக அமையும். எனவே, தொகுதி மறுவரையறை மசோதாவிற்கு ஆதரவளிப்பதன் மூலம் தமிழகத்திற்கு வரவிருக்கும் அரசியல் ரீதியான பாதிப்புகளையும், தங்களின் எதிர்காலத் தேர்தல் வியூகங்களையும் மிகக் கவனமாகக் கணக்கிட்டே திமுக தனது இறுதி முடிவை எடுக்கும் எனத் தெரிகிறது.