“பதவி வெறி… அப்பட்டமான துரோகம்”… திமுகவின் முதுகில் குத்திய காங்கிரஸ்…. மோடி வீசிய ‘அரசியல்’ அணுகுண்டு….!

பெங்களூருவில் நடைபெற்ற பொதுக்கூட்டத்தில் உரையாற்றிய பிரதமர் நரேந்திர மோடி, காங்கிரஸ் கட்சி தனது அரசியல் ஆதாயத்திற்காகத் தனது கூட்டணிக் கட்சியான திமுகவையே முதுகில் குத்திவிட்டதாகக் கடுமையாகச் சாடியுள்ளார். கடந்த 25 முதல் 30 ஆண்டுகளாக திமுகவும் காங்கிரஸும் மிக நெருக்கமான உறவைப் பேணி வந்ததைச் சுட்டிக்காட்டிய அவர், குறிப்பாக 2014-க்கு முந்தைய பத்தாண்டுகளில் காங்கிரஸ் தலைமையிலான மத்திய அரசு நீடித்ததற்கு திமுகவே முக்கியத் தூணாக விளங்கியதாகக் குறிப்பிட்டார். இக்கட்டான சூழல்களில் எல்லாம் காங்கிரஸைக் காப்பாற்றிய திமுகவிற்கு, இறுதியில் காங்கிரஸ் கைம்மாறாகச் செய்தது நம்பிக்கைத் துரோகம் மட்டுமே என்று பிரதமர் தனது உரையில் ஆவேசமாகத் தெரிவித்தார்.

தொடர்ந்து பேசிய பிரதமர், காங்கிரஸ் கட்சி எப்போதும் அதிகார வேட்கையுடனும் பதவி வெறியுடனும் செயல்படுவதாக விமர்சித்தார். “தனது வளர்ச்சிக்குத் தோள் கொடுத்த திமுகவை, அரசியல் சூழல் மாறிய முதல் வாய்ப்பிலேயே காங்கிரஸ் கட்சி முதுகில் குத்தியது” என்று குறிப்பிட்ட அவர், தற்போது அரசியல் களத்தில் தனது இருப்பைத் தக்கவைத்துக்கொள்ள காங்கிரஸ் மீண்டும் ஒரு புதிய துணையைத் தேடி வருவதாக ஏளனம் செய்தார். தமிழக அரசியல் சூழலை உற்றுநோக்கினால் காங்கிரஸின் இந்தத் துரோக வரலாறு வெளிப்படும் என்றும், சந்தர்ப்பவாத அரசியலுக்காகத் தங்களை வளர்த்தவர்களையே வீழ்த்தும் குணம் காங்கிரஸிற்கு உண்டு என்றும் பிரதமர் மோடி தனது விமர்சனத்தை முன்வைத்தார்.