சீனியர் தலைவர்களுக்கு ஆப்பு?… தேர்தலில் புதுமுகங்களை இறக்கும் மேலிடம்…. தமிழக பாஜகவின் அதிரடி மாஸ்டர் பிளான்….!

தமிழக சட்டசபைத் தேர்தலில் பாஜக தனது வியூகங்களை மாற்றியமைத்து, சீனியர் தலைவர்களுக்குப் பதிலாக அதிகளவில் புதுமுகங்களுக்கு வாய்ப்பளிக்கத் திட்டமிட்டுள்ளது. மாநில அளவில் கட்சியை வலுப்படுத்தவும், எதிர்காலத் தலைவர்களை உருவாக்கவும் இந்த முடிவை அக்கட்சி மேலிடம் எடுத்துள்ளதாகக் கூறப்படுகிறது. குறிப்பாக, சர்ச்சைகளில் சிக்காத மற்றும் கட்சிக்கு உழைக்கும் இளம் தலைவர்களை முன்னிறுத்துவதன் மூலம், தமிழகத்தில் பாஜகவின் வளர்ச்சியை அடுத்த கட்டத்திற்கு எடுத்துச் செல்ல கட்சி தலைமை முனைப்பு காட்டி வருகிறது.

இந்த மாற்றத்திற்குப் பின்னால் மூன்று முக்கிய காரணங்கள் இருப்பதாகக் கருதப்படுகிறது. முதலாவதாக, தமிழகத்தில் தற்போது நிலவும் அரசியல் சூழலைச் சாதகமாகப் பயன்படுத்தி, இரட்டை இலக்கத்தில் எம்எல்ஏக்களை வெற்றி பெற வைக்க புதுமுகங்களே சரியான தேர்வாக இருக்கும் என்று பாஜக நம்புகிறது. இரண்டாவதாக, திமுக மற்றும் தவெக போன்ற கட்சிகள் இளம் தலைவர்களை முன்னிலைப்படுத்தி வரும் நிலையில், பாஜகவும் அதே பாதையில் பயணித்து சீனியர்களைப் படிப்படியாக ஒதுக்கி, இளைஞர்கள் மற்றும் பெண் தலைவர்களுக்கு முக்கியத்துவம் அளித்து கட்சியைப் புத்துணர்வுடன் வைத்திருக்கத் திட்டமிட்டுள்ளது.

மூன்றாவதாக, கடந்த 2021-ஆம் ஆண்டு நடைபெற்ற சட்டசபை தேர்தலின் போது, பாஜக களமிறக்கிய புதுமுகங்கள் பல்வேறு தொகுதிகளில் கணிசமான வாக்குகளைப் பெற்றது அக்கட்சிக்கு நம்பிக்கையை அளித்துள்ளது. உதாரணமாக, அரவக்குறிச்சி, மொடக்குறிச்சி, ஊட்டி மற்றும் ஆயிரம் விளக்கு போன்ற தொகுதிகளில் போட்டியிட்ட புதுமுகங்கள் அதிகப்படியான வாக்குகளைப் பெற்று, வலுவான போட்டியை வழங்கியதை மேலிடம் சுட்டிக்காட்டுகிறது. இந்த யுக்தியை மீண்டும் கையாள்வதன் மூலம் வெற்றியைப் பெற முடியும் என்பது அக்கட்சியின் கணக்கு.

கூட்டணி தொடர்பான பேச்சுவார்த்தைகள் இன்னும் அதிகாரப்பூர்வமாக நிறைவடையாத நிலையில், வேட்பாளர் தேர்வில் பாஜக எடுத்துள்ள இந்த அதிரடி முடிவு, கட்சிக்குள் பெரும் எதிர்பார்ப்பை ஏற்படுத்தியுள்ளது. சீனியர்களுக்குப் பதிலாகப் புதியவர்களுக்கு வாய்ப்பு வழங்குவது, கட்சியினரிடையே ஒருவித புத்துணர்ச்சியை ஏற்படுத்தும் என்றும், இது தேர்தல் களத்தில் சாதகமான மாற்றங்களை உருவாக்கும் என்றும் பாஜக மேலிடம் உறுதியாக நம்புகிறது.