2026-ல் ‘பீகார்’ ஃபார்முலா?.. பாஜகவின் ‘ஆபரேஷன் 50’…. சஸ்பென்ஸை உடைத்த அண்ணாமலை… அதிர்ச்சியில் திராவிட கட்சிகள்…!

தமிழகத்தில் நடைபெறவுள்ள சட்டசபைத் தேர்தலை எதிர்கொள்ளும் வகையில், பாரதிய ஜனதா கட்சி தனது தேர்தல் பணிகளை அதிரடியாகத் தொடங்கியுள்ளது. இதன்படி, தமிழகத்தில் மொத்தம் 50 தொகுதிகளில் தேர்தல் பணிகளை உடனடியாக ஆரம்பிக்குமாறு அக்கட்சியின் தலைமை தனது நிர்வாகிகளுக்கு முக்கிய உத்தரவைப் பிறப்பித்துள்ளது. அதிமுக உடனான தொகுதிப் பங்கீடு குறித்து இன்னும் அதிகாரப்பூர்வமான இறுதி முடிவு எடுக்கப்படாத நிலையிலும், வெற்றி வாய்ப்புள்ள தொகுதிகளைக் குறிவைத்து பாஜக இந்த முன்னெச்சரிக்கை நடவடிக்கையில் இறங்கியுள்ளது.

முக்கிய நகரங்களான சென்னையில் 4 தொகுதிகள், கோவையில் 3 தொகுதிகள் மற்றும் மதுரையில் 2 தொகுதிகள் எனப் பிரிக்கப்பட்டு, அங்கு போட்டியிட வாய்ப்புள்ள உத்தேச வேட்பாளர்கள் மற்றும் பொறுப்பாளர்கள் நியமிக்கப்பட்டுள்ளனர். குறிப்பாக, சென்னை விருகம்பாக்கத்தில் தமிழிசை சௌந்தரராஜன், வேளச்சேரியில் எஸ்.ஜி. சூர்யா, மயிலாப்பூரில் நாராயணன் திருப்பதி, தியாகராய நகரில் வினோஜ் பி. செல்வம் ஆகியோர் பணிகளைத் தொடங்க அறிவுறுத்தப்பட்டுள்ளனர். அதேபோல், கோவையில் வானதி சீனிவாசன் மற்றும் அண்ணாமலை ஆகியோரின் பெயர்களும் உத்தேசப் பட்டியலில் இடம்பிடித்துள்ளன.

அண்மையில் நடைபெற்ற பாஜக ஆலோசனைக் கூட்டத்தில், தேர்தல் பணிகளை முன்கூட்டியே திட்டமிடுவதன் அவசியம் குறித்து அண்ணாமலை வலியுறுத்தியிருந்தார். அதன் தொடர்ச்சியாகவே தமிழக பாஜக தலைவர் நயினார் நாகேந்திரன் இந்த முக்கிய முடிவை எடுத்துள்ளார். நயினார் நாகேந்திரன் திருநெல்வேலி மற்றும் சாத்தூர் ஆகிய இரண்டு தொகுதிகளில் தனது தேர்தல் பணிகளைத் தொடங்கியுள்ள நிலையில், மாநிலத்தின் பிற பகுதிகளான ஈரோடு, திருப்பூர், தஞ்சாவூர் மற்றும் கன்னியாகுமரி மாவட்டங்களிலும் நிர்வாகிகள் களப்பணிகளை முடுக்கிவிட்டுள்ளனர்.

இந்த அதிரடி நடவடிக்கை பாஜக தொண்டர்களிடையே பெரும் உற்சாகத்தை ஏற்படுத்தியுள்ளது. தொகுதிகளை முன்கூட்டியே தேர்வு செய்து பணிகளைத் தொடங்குவதன் மூலம் வாக்காளர்களைச் சென்றடைய போதிய கால அவகாசம் கிடைக்கும் என அக்கட்சி நம்புகிறது. அதிமுக உடனான கூட்டணி பேச்சுவார்த்தையின் போது வலுவான பேரம் பேசவும், தேர்தல் களத்தில் தங்களது செல்வாக்கை நிரூபிக்கவும் இந்த ‘50 தொகுதிகள் திட்டம்’ பாஜகவிற்கு ஒரு முக்கிய உத்தியாகப் பார்க்கப்படுகிறது. இதன் காரணமாக சென்னை கமலாலயம் தற்போது தேர்தல் ஜுரத்தில் களைகட்டத் தொடங்கியுள்ளது.