மதுரை திருப்பரங்குன்றம் மலைப்பகுதியில் கார்த்திகை தீபம் ஏற்றுவது தொடர்பாக நிலவி வரும் சர்ச்சையின் பின்னணியில், பாஜக மூத்த தலைவர் ஹெச். ராஜா மற்றும் அக்கட்சியினர் அங்கு செல்ல முயன்றபோது காவல்துறையினரால் தடுத்து நிறுத்தப்பட்டனர். உயர்நீதிமன்ற உத்தரவின்படி குறிப்பிட்ட இடத்தில் தீபம் ஏற்ற அனுமதி கோரி பாஜக மற்றும் இந்து அமைப்பினர் திரண்டதால் அங்கு பெரும் பரபரப்பு ஏற்பட்டது. அப்போது தங்களை தடுத்த காவல்துறையினருடன் ஹெச். ராஜா கடும் வாக்குவாதத்தில் ஈடுபட்டார். காவல்துறையினர் ஒருதலைப்பட்சமாகச் செயல்படுவதாகவும், இந்துக்களின் வழிபாட்டு உரிமையைப் பறிப்பதாகவும் அவர் குற்றம் சாட்டினார்.
இந்த மோதலைத் தொடர்ந்து, அசம்பாவிதங்களைத் தவிர்க்க அங்கு ஆயிரக்கணக்கான போலீசார் குவிக்கப்பட்டனர். தடையை மீறி மலை ஏறி தீபம் ஏற்ற முயன்ற ஹெச். ராஜா உள்ளிட்ட பாஜக நிர்வாகிகளைப் போலீசார் கைது செய்து தனியார் திருமண மண்டபத்தில் அடைத்தனர். இந்தப் பிரச்சனை தொடர்பாக ஹெச். ராஜா மீது மத நல்லிணக்கத்தைச் சீர்குலைத்தல் மற்றும் அரசு அதிகாரிகளைப் பணி செய்ய விடாமல் தடுத்தல் உள்ளிட்ட பிரிவுகளின் கீழ் வழக்குப்பதிவு செய்யப்பட்டுள்ளது. திருப்பரங்குன்றம் மலையில் அமைந்துள்ள தர்கா மற்றும் கோயில் நிலம் தொடர்பான இந்த விவகாரம் தற்போது நீதிமன்றத்தின் பரிசீலனையில் உள்ளது குறிப்பிடத்தக்கது.