பாஜகவுடன் கூட்டணி?… தேமுதிகவுக்கு காத்திருக்கும் ‘மெகா’ ஆஃபர்… எல். முருகன் கொடுத்த ‘ட்விஸ்ட்’… தமிழக அரசியலில் அதிரடி திருப்பம்….!

தமிழகத்தில் தேர்தல் களம் சூடுபிடித்துள்ள நிலையில், தேமுதிக எந்தக் கூட்டணியில் இணையும் என்பது குறித்த மர்மம் இன்னும் நீடிக்கிறது. சென்னை கமலாலயத்தில் செய்தியாளர்களைச் சந்தித்த மத்திய இணை அமைச்சர் எல். முருகன், தேமுதிகவுடனான கூட்டணி குறித்து முக்கிய கருத்துக்களைப் பகிர்ந்துள்ளார். தேமுதிகவுடன் கூட்டணி பேச்சுவார்த்தைகள் நடைபெற்று வருவதாகவும், இது குறித்த இறுதிக்கட்ட முடிவை பாஜகவின் தேசியத் தலைமை உரிய நேரத்தில் அறிவிக்கும் என்றும் அவர் தெரிவித்துள்ளார்.

கடந்த ஜனவரி மாதம் நடைபெற்ற தேமுதிக மாநாட்டில் கூட்டணி குறித்து பிரேமலதா விஜயகாந்த் அறிவிப்பார் என்று எதிர்பார்க்கப்பட்டது. ஆனால், அந்த மாநாட்டில் எவ்வித அறிவிப்பும் வெளியாகாதது அக்கட்சித் தொண்டர்களிடையே சலசலப்பை ஏற்படுத்தியது. இதற்கிடையே, தேமுதிக தற்போது விருப்ப மனுக்களைப் பெற்று வரும் நிலையில், அவர்கள் திமுக மற்றும் பாஜக ஆகிய இரு தரப்புடனும் ரகசியப் பேச்சுவார்த்தையில் ஈடுபட்டு வருவதாகத் தகவல்கள் தெரிவிக்கின்றன.

திமுக கூட்டணியைப் பொறுத்தவரை தொகுதிகளைப் பகிர்ந்து கொள்வதில் இழுபறி நீடிப்பதாகக் கூறப்படுகிறது. அதே வேளையில், பாஜக தலைமையிலான தேசிய ஜனநாயகக் கூட்டணியில் இணைந்தால் கூடுதல் இடங்கள் கிடைக்க வாய்ப்புள்ளதாக தேமுதிக தலைமை கருதுகிறது. மத்திய அமைச்சர் எல். முருகனின் தற்போதைய பதில், தேமுதிகவை பாஜக கூட்டணிக்குள் கொண்டு வருவதற்கான கதவுகள் இன்னும் திறந்தே இருப்பதைக் காட்டுகிறது.

தமிழக அரசுக்குத் தேவையான நிதியை மத்திய அரசு வழங்கவில்லை என்ற திமுகவின் குற்றச்சாட்டையும் எல். முருகன் மறுத்துள்ளார். மத்திய அரசின் விதிமுறைகளைப் பின்பற்றினால் மட்டுமே நிதி ஒதுக்கீடு செய்ய முடியும் என்று குறிப்பிட்ட அவர், தேர்தல் நெருங்கும் வேளையில் கூட்டணி தொடர்பான குழப்பங்களுக்கு விரைவில் பாஜக தேசியத் தலைமை முற்றுப்புள்ளி வைக்கும் என்று நம்பிக்கை தெரிவித்துள்ளார். தேமுதிகவின் இந்த முடிவைப் பொறுத்தே தமிழக தேர்தல் களத்தில் புதிய திருப்பங்கள் ஏற்படும் என்று எதிர்பார்க்கப்படுகிறது.