உலகத்துல எங்கயாவது உதவி இயக்குனரின் புகைப்படத்தைப் போட்டு போஸ்டர் அடிப்பாங்களா?… பாரதிராஜா காட்டிய வெறித்தன மாஸ்!

தமிழ் சினிமாவின் போக்கை மாற்றிய ஒரு சில இயக்குனர்களில் பாரதிராஜாவும் ஒருவர். அவர் இயக்கத்தில் வெளியான 16 வயதினிலே திரைப்படம் தமிழ் சினிமாவையே புரட்டி போட்டது. தொடர்ந்து ரத்தமும் சதையுமான கிராமிய மணம் கொண்ட படங்களை கொடுத்து தமிழ் சினிமா ரசிகர்களின் இதயங்களைக் கொள்ளை கொண்டார்.

அவர் தன்னை ஒரு இயக்குனராக நிலைநிறுத்திக் கொண்ட பின்னரும் தனது படங்களுக்கு முன்னணி நடிகர்களை தேடி செல்லாமல் புதுமுக நடிகர்களையே பெரும்பாலும் பயன்படுத்தினார். ஆனால் தான் இயக்கிய முதல் மரியாதை படத்துக்கு அந்த பாத்திரத்தை உணர்ந்து நடிக்க வேண்டிய ஒரு நடிகர் தேவை என்பதால் சிவாஜி கணேசனை தேடிச் சென்றார்.

பாரதிராஜாவின் வளர்ச்சி எப்படிப்பட்ட அசுரவளர்ச்சியாக இருந்தது என்பதற்கு ஒரு தகவலை சொல்லலாம். சமீபத்தில் பாரதிராஜாவின் உதவி இயக்குனராக இருந்தவரும் பத்திரிக்கையாளருமான சித்ரா லட்சுமணன் இந்த தகவலை தன்னுடைய யுடியூப் சேனலில் பகிர்ந்துள்ளார்.

பாரதிராஜா இயக்குனர் ஆவதற்கு முன்னால் தமிழ் மற்றும் கன்னடம் ஆகிய மொழிகளில் சில படங்களில் உதவி இயக்குனராகப் பணியாற்றியுள்ளார். அப்படி அவர் பணியாற்றிய படங்களில் ஒன்றுதான் அதிர்ஷ்டம் அழைக்கிறது. அந்த படத்தில் தேங்காய் சீனிவாசன் கதாநாயகனாக நடிக்க சௌகார் ஜானகி உள்ளிட்டவர்கள் முக்கிய வேடத்தில் நடித்துள்ளனர். படத்தை ஏ ஜெகநாதன் இயக்கியுள்ளார். இந்த படம் ரிலீஸின் போது பெரிய வெற்றி பெறவில்லை.

இதற்கிடையில் பாரதிராஜா 16 வயதினிலே திரைப்படத்தின் மூலம் இயக்குனராக அறிமுகமாகி மிகப்பெரிய தாக்கத்தை ஏற்படுத்திவிட்டார். அவரின் அடுத்தடுத்த படங்கள் வரிசையாக ஹிட்டாகிவந்தன. இந்நிலையில் அதிர்ஷ்டம் அழைக்கிறது படத்தை ரி ரிலீஸ் செய்துள்ளனர். அப்போது அந்த படத்தில் நடித்தவர்கள் யாருக்குமே மிகப்பெரிய மாஸ் இல்லை. அதனால் பாரதிராஜாவின் புகைப்படத்தை போஸ்டரில் “அசோசியேட் டைரக்டர்” எனப் போட்டுள்ளனர்.

அந்தளவுக்கு பாரதிராஜா தமிழ் சினிமா ரசிகர்கள் மத்தியில் தாக்கத்தை ஏற்படுத்தியிருந்தாராம். இந்த தகவலைப் பகிர்ந்த சித்ரா லட்சுமணன் அந்த போஸ்டரையும் பகிர்ந்துள்ளார். அந்த போஸ்டர் உங்கள் பார்வைக்காக..