“நீ பேச்சுலர்.. வீட்டை உடனே காலி பண்ணு!”… வீட்டு உரிமையாளர்களின் அட்ராசிட்டி… வாடகை வீடு தேடும் பேச்சுலர்களா நீங்கள்?… அப்போ முதல்ல இத படிங்க…!!

பெங்களூரு நகரம் தகவல் தொழில்நுட்பத் துறைக்கு பெயர் பெற்றிருந்தாலும், அங்கு வாடகைக்கு வீடு தேடுவது பலருக்கும், குறிப்பாக பிரம்மச்சாரிகளுக்கு பெரும் சவாலாகவே உள்ளது. சமீபத்தில், இணையத்தில் வைரலான ஒரு சம்பவம் இந்த பிரச்சனையை மீண்டும் வெளிச்சத்திற்கு கொண்டு வந்துள்ளது. நீண்ட தேடலுக்குப் பிறகு ஒரு இளைஞர் தனக்கான ஒரு வீட்டை வாடகைக்கு பேசி, அதற்கான முன்பணத்தையும் செலுத்தியுள்ளார். இனி நிம்மதியாக இருக்கலாம் என நினைத்த அவருக்கு ஒரு அதிர்ச்சி காத்திருந்தது.

அவரது அந்த மகிழ்ச்சி நீண்ட நேரம் நீடிக்கவில்லை. வீட்டை உறுதி செய்து பணத்தை செலுத்திய சிறிது நேரத்திலேயே, வீட்டின் உரிமையாளர் அவரை வீட்டை விட்டு வெளியேறுமாறு கட்டாயப்படுத்தியுள்ளார். இதற்கு அவர் கூறிய ஒரே காரணம், அந்த இளைஞர் ஒரு ‘பிரம்மச்சாரி’ என்பது மட்டுமே. அதுமட்டுமின்றி, வீட்டு உரிமையாளர் மிகவும் கடுமையாகவும், விரோதப் போக்குடனும் நடந்து கொண்ட விதம் அந்த இளைஞருக்கு பெரும் மன உளைச்சலை ஏற்படுத்தியுள்ளது.

இந்தச் சம்பவம் சமூக வலைத்தளங்களில் பலரது கவனத்தையும் ஈர்த்து, பெரும் விவாதத்தை ஏற்படுத்தியுள்ளது. பெங்களூருவில் வேலை பார்க்கும் பல சிங்கிள் இளைஞர்களும் தங்களுக்கு நேர்ந்த இதே போன்ற கசப்பான அனுபவங்களை இணையத்தில் பகிர்ந்து வருகின்றனர். நகரத்தின் பொருளாதாரத்திற்கு முக்கியப் பங்காற்றும் இளம் பணியாளர்களை, வெறும் திருமண நிலைக்காக வீட்டை மறுத்து பாரபட்சத்துடன் நடத்துவது எந்த வகையில் நியாயம் என்ற கேள்வியை இந்த நிகழ்வு எழுப்பியுள்ளது.