FLASH: ரஜினியின் புகைப்படத்தை எந்த அரசியல் கட்சியும் பயன்படுத்தக்கூடாது… தலைமை அலுவலகம் அதிகாரபூர்வ உத்தரவு..!!

அகில இந்திய ரஜினிகாந்த் ரசிகர் நற்பணி மன்றத்தின் பெயரையோ அல்லது நடிகர் ரஜினிகாந்தின் புகைப்படத்தையோ எந்தவொரு அரசியல் கட்சியோ அல்லது அமைப்போ பயன்படுத்தக் கூடாது என அதிகாரப்பூர்வமாக உத்தரவிடப்பட்டுள்ளது. இது தொடர்பாக சென்னை கோடம்பாக்கத்தில் உள்ள தலைமை அலுவலகத்தில் இருந்து இன்று வெளியிடப்பட்டுள்ள அதிகாரப்பூர்வ அறிக்கையில், ரஜினிகாந்தின் நேரடி உத்தரவின் பேரில் இந்த தகவல் ரசிகர்களுக்கும் மன்ற நிர்வாகிகளுக்கும் திட்டவட்டமாகத் தெரிவிக்கப்பட்டுள்ளது.

சமீபகாலமாக தமிழக அரசியல் சூழலில் ஏற்பட்டுள்ள பல்வேறு அதிரடி மாற்றங்கள் மற்றும் மாற்றுக்கட்சியினர் இணையும் விழாக்களுக்கு மத்தியில், ரசிகர் மன்றத்தின் பெயரை அரசியல் ஆதாயங்களுக்காக யாரும் தவறாகப் பயன்படுத்தக் கூடாது என்பதைத் தெளிவுபடுத்தவே இந்த முக்கிய சுற்றறிக்கை வெளியிடப்பட்டுள்ளது. ரஜினிகாந்த் ரசிகர் நற்பணி மன்றம் தொடர்ந்து மக்கள் நலப்பணிகளில் மட்டுமே கவனம் செலுத்தும் என்பதும், அரசியல் சார்பற்ற அமைப்பாகவே அது நீடிக்கும் என்பதும் இதன் மூலம் மீண்டும் ஒருமுறை ரசிகர்களுக்குத் திட்டவட்டமாக அறிவுறுத்தப்பட்டுள்ளது.