இளையராஜாவை விட்டுட்டு ஒரே ஒரு படம் ரஹ்மானோடு வேலை செய்யுங்கள்… ஆசையாகக் கேட்ட மௌனிகாவுக்கு பாலு மகேந்திராவின் பதில் இதுதான்!

தமிழ் சினிமாவில் தன்னுடைய தனித்துவமான பாணியால் இயக்கம் மற்றும் ஒளிப்பதிவு இரண்டிலும் முத்திரை பதித்தவர் இயக்குனர் பாலு மகேந்திரா. அவர் இயக்கிய வீடு, சந்தியா ராகம், மூன்றாம் பிறை உள்ளிட்ட படங்கள் தமிழ் சினிமாவின் பொக்கிஷமாக உள்ளன.

பாலு மகேந்திராவின் படங்களில் பாடல்கள் மற்றும் பின்னணி இசை வெகு சிறப்பாக அமைந்திருக்கும். அவர் தன்னுடைய மொத்த சினிமா வாழ்க்கையில் சலீல் சௌத்ரி மற்றும் இளையராஜா ஆகிய இருவரோடு மட்டுமே பணியாற்றியுள்ளார். மூடுபனியில் ஆரம்பித்த பாலு மகேந்திரா மற்றும் இளையராஜா கூட்டணி அவரின் கடைசி படமான தலைமுறைகள் வரை நீடித்தது.

இந்நிலையில் பாலு மகேந்திராவின் இரண்டாவது மனைவியான மௌனிகா பாலு மகேந்திரா- இளையராஜா நட்பைப் பற்றி பேசியுள்ளார். ஒரு நேர்காணலில் “பாலு மகேந்திரா ஒரு நாளைக்கு ஒரு தடவையாவது கமல்ஹாசன், பாரதிராஜா மற்றும் இளையராஜா பற்றி பேசாமல் இருக்கமாட்டார். திடீரென்று பேசிக்கொண்டிருக்கும் போதே ‘நான் போய் இளையராஜாவை போய் பார்த்துவிட்டு வருகிறேன்’ எனக் கூறி சென்று விடுவார்.

நான் ஒரு முறை அவரிடம் ஆசையாக ஒரே ஒரு முறைய ரஹ்மானோடு ஒரு படம் பண்ணுங்கள் எனக் கூறினேன். அதற்கு அவர் ‘ரஹ்மான் நல்ல இசையமைப்பாளர்தான். நல்ல பையன். ஆனால் நான் இளையராஜாவோடு ஆரம்பித்தேன். அவரோடே இன்னும் சில படங்கள் பண்ணிவிட்டு போய் விடுகிறேன் என சொல்லிவிடுவார்.” எனக் கூறியுள்ளார்.

ரோஜா படத்துக்காக ஏ ஆர் ரஹ்மான் தேசிய விருது வாங்கிய போது அந்த தேர்வுக்குழுவின் தலைவராக இருந்தவர் பாலு மகேந்திராதான் என்பது குறிப்பிடத்தக்கது. அப்போது இறுதிப் பட்டியலில் இளையராஜாவுக்கும் ரஹ்மானுக்கும் இடையே போட்டி வந்த போது தான்தான் ஒரு 22 வயது பையனுக்கு அந்த விருது கிடைக்க வேண்டும் என முடிவு செய்து ரஹ்மானுக்கு தேசிய விருது கொடுத்ததாக கூறியிருந்தார் என்பது குறிப்பிடத்தக்கது.