அயோத்தி ராமர் கோயில் விவகாரம்… டெலிட் செய்யப்பட்ட வீடியோவில் சிக்கிய ஆதாரம்… அம்பலமான அதிர்ச்சி உண்மை…!

உத்தரப் பிரதேச மாநிலம் அயோத்தியில் அமைந்துள்ள புகழ்பெற்ற ராமர் கோயிலில், பக்தர்களின் காணிக்கை பணத்தில் பெரும் முறைகேடு மற்றும் திருட்டு நடந்துள்ளது நாடு முழுவதும் அதிர்ச்சியை ஏற்படுத்தியுள்ளது. தினந்தோறும் லட்சக்கணக்கான பக்தர்கள் வந்து செல்லும் இந்த வரலாற்றுச் சிறப்புமிக்க கோயிலில், காணிக்கை பணத்தை எண்ணும் பணியில் ஈடுபட்டிருந்த ஊழியர்களே இந்த கைவரிசையைக் காட்டியுள்ளனர் என்பது விசாரணையில் அம்பலமாகியுள்ளது. இது தொடர்பாக போலீஸார் வழக்குப்பதிவு செய்து விசாரணையை தீவிரப்படுத்தியுள்ளனர்.

இந்த வழக்கின் மிக முக்கிய திருப்பமாக, கோயிலின் காணிக்கை எண்ணும் அறையில் இருந்த சிசிடிவி பதிவுகள் சில திட்டமிட்டு டெலிட் செய்யப்பட்டது கண்டுபிடிக்கப்பட்டது. ஆனால், போலீஸாரின் அதிரடி நடவடிக்கையால், தடயவியல் மற்றும் தகவல் தொழில்நுட்ப நிபுணர்கள் உதவியுடன் அந்த டெலிட் செய்யப்பட்ட வீடியோ காட்சிகள் தற்போது வெற்றிகரமாக மீட்கப்பட்டுள்ளன. மீட்கப்பட்ட காட்சிகளில், ஊழியர்கள் சிலர் பணத்தை எண்ணிக்கொண்டே, மிக லாவகமாக ரூபாய் நோட்டுகளை தங்களது சாக்ஸ் (காலுறைகள்) மற்றும் சட்டைப் பைகளில் மறைத்து எடுத்துச் செல்லும் திடுக்கிடும் காட்சிகள் பதிவாகியுள்ளதாகத் தகவல்கள் வெளியாகியுள்ளன.

தற்போது மீட்கப்பட்டுள்ள வீடியோக்களின் தரம் சற்று குறைவாக இருப்பதால், குற்றவாளிகளைத் தெளிவாக அடையாளம் காணும் வகையில் வீடியோக்களின் தரத்தை மேம்படுத்தும் தொழில்நுட்பப் பணிகளில் போலீஸார் தீவிரமாக ஈடுபட்டுள்ளனர். இதற்கிடையில், இந்த முறைகேடு தொடர்பாக ஏற்கனவே கைது செய்யப்பட்டுள்ள ராமசங்கர் மிஸ்ரா, மனிஷ் யாதவ், லவ்குஷ் மிஸ்ரா, அனுகல்ப் மிஸ்ரா மற்றும் கருணேஷ் பாண்டே ஆகிய 5 பேரிடம் அயோத்தி மாவட்ட சிறையில் வட்டாட்சியர் அசுதோஷ் திவாரி தலைமையிலான போலீஸ் குழுவினர் அதிரடி விசாரணை நடத்தியுள்ளனர்.

விசாரணையின் போது கைதிகள் ஒருவருக்கொருவர் பேசி, சாட்சியங்களை மாற்றவோ அல்லது ஒரே மாதிரியான பொய் விளக்கங்களை அளிக்கவோ முற்படலாம் என்பதால், சிறை நிர்வாகம் அவர்கள் அனைவரையும் தனித்தனி அறைகளுக்கு மாற்றியுள்ளது. மேலும், திருடப்பட்ட பணம் எவ்வாறு பங்கிடப்பட்டது மற்றும் எவ்வளவு தொகை முறைகேடு செய்யப்பட்டுள்ளது என்பதைக் கண்டறிய இவர்களின் வங்கிப் பரிவர்த்தனைகள் மற்றும் டிஜிட்டல் நிதி ஆவணங்களை போலீஸார் ஒப்பிட்டு ஆய்வு செய்து வருகின்றனர். இச்சம்பவம் அயோத்தி ராமர் கோயில் நிர்வாக வட்டாரத்தில் பெரும் பரபரப்பை ஏற்படுத்தியுள்ளது.