போச்சம்பள்ளி அருகே மத்தூர் கிராமத்தைச் சேர்ந்தவர் முருகன்(40). இவரது மனைவி ஜானகி(38). இந்த தம்பதிக்கு 3 மகன்கள் உள்ளனர். கூலி வேலை செய்து குடும்பத்தை நடத்திய முருகன், 3 ஆண்டுகளுக்கு முன் உடல் நலக் குறைவால் இறந்தார். அதன் பின் ஜானகி தனது மூன்று மகன்களுடன் தனிமையில் வாழ்ந்து வந்தார்.
இதற்கிடையில், வேலைக்குச் சென்ற இடத்தில் 30 வயது ராஜதுரை என்பவருடன் ஜானகிக்கு நெருக்கமான பழக்கம் ஏற்பட்டது. டிம்பர் லாரி ஓட்டுபவரான ராஜதுரை, அடிக்கடி ஜானகி வேலை பார்க்கும் இடத்திற்கு வந்து சென்றார். இந்தத் தொடர்பு படிப்படியாக திருமண வரம்பை மீறிய உறவாக மாறி இருவரும் அவ்வப்போது தனிமையில் உல்லாசமாக இருந்தனர்.
இந்த நிலையில் ஜானகியின் மகன்கள் படிப்பை முடித்து சென்னைக்குச் சென்று வேலை பார்த்தனர். தாய் தனது காதலனுடன் ஊரில் சுற்றுவதை அறிந்த மகன்கள், ஜானகியிடம் விசாரித்தனர். இதனால் பயந்த ஜானகி, ராஜதுரையுடனான உறவை முடித்துவிட்டு மகன்களுடன் சென்னைக்கு வந்து வாழ்ந்தார். ஆனால் ஜானகியை பிரிய முடியாமல் ராஜதுரை அடிக்கடி தொலைபேசியில் அவரை தொடர்ந்து அழைத்து, கிராமத்திற்கு திரும்ப வருமாறு தொந்தரவு செய்தார். இருப்பினும் ஜானகி சென்னையில் தங்கி வேலை செய்து வந்தார்.
சமீபத்தில் சொத்து விவகாரம் தொடர்பாக ஜானகி மகன்களுடன் சொந்த ஊருக்கு வந்தார். இதை அறிந்த ராஜதுரை, அவரை நேரில் சந்திக்க வற்புறுத்தினார். இதுகுறித்து ஜானகி தனது மகன்களிடம் கூறியுள்ளார். இதனை கேட்டு அதிர்ச்சியடைந்த மகன்கள் ராஜதுரையை கொலை செய்ய முடிவெடுத்தனர். அதன்படி சமாதானமாகப் பேசி, ராஜதுரையை அருகிலுள்ள மாந்தோப்புக்கு அழைத்துச் சென்று சரமாரியாக வெட்டினர்.
இதில் படுகாயமடைந்த ராஜதுரை அவர்களிடமிருந்து தப்பி, அருகிலுள்ள மருத்துவமனைக்குச் சென்று சிகிச்சை பெற்று வருகிறார். இச்சம்பவம் குறித்து போலீசார் வழக்கு பதிவு செய்து, குற்றவாளிகளைத் தேடி விசாரணை நடத்தி வருகின்றனர்.