என்னவொரு அவமானம்..! விளையாட்டு வீரர்களுக்கே இந்த நிலைமையா..? ரயிலின் கழிப்பறைக்கு வெளியே.. வைரலாகும் வீடியோவால் அதிர்ச்சி..!!

உத்தரபிரதேசத்தில் நடைபெற்ற 69-வது தேசியப் பள்ளி மல்யுத்த சாம்பியன்ஷிப் போட்டியில் ஒடிசா மாநிலத்தைப் பிரதிநிதித்துவப்படுத்திய 18 இளம் வீரர்கள், சொல்லொணாத் துயரங்களுக்கு இடையே பயணம் செய்துள்ளனர். சமூக வலைதளங்களில் வைரலாகி வரும் வீடியோவில், இந்த இளம் விளையாட்டு வீரர்கள் ரயிலின் கழிப்பறைக்கு வெளியே உள்ள மிகக்குறுகிய இடத்தில், எஃகு தரையில் அமர்ந்து பயணிக்கும் அதிர்ச்சியூட்டும் காட்சிகள் இடம்பெற்றுள்ளன.

தேசிய அளவில் மாநிலத்தைப் பெருமைப்படுத்தச் சென்ற இந்த வீரர்களுக்கு, விளையாட்டுத் துறை சார்பில் உறுதிப்படுத்தப்பட்ட (Confirmed Tickets) ரயில் டிக்கெட்டுகள் வழங்கப்படவில்லை எனக் கூறப்படுகிறது. இதனால், அவர்கள் பொதுப் பெட்டிகளில் கடும் நெரிசலில் சிக்கித் தவித்துள்ளனர். அதிர்ச்சிகரமான விஷயம் என்னவென்றால், போட்டிகள் முடிந்து ஊர் திரும்பும் போதும் அவர்களுக்கு முறையான பயண ஏற்பாடுகள் செய்யப்படவில்லை. செல்லும் போதும் வரும் போதும் அதே மோசமான நிலையிலேயே அவர்கள் பயணிக்க வேண்டிய கட்டாயம் ஏற்பட்டது பெரும் விமர்சனத்திற்கு உள்ளாகியுள்ளது. நாட்டிற்காகப் பதக்கங்களை வெல்லும் முனைப்பில் செல்லும் இளம் வீரர்களுக்கு அடிப்படை வசதிகள் கூடச் செய்து தராதது விளையாட்டு ஆர்வலர்களிடையே பெரும் கொந்தளிப்பை ஏற்படுத்தியுள்ளது.