“பூஜை அறைக்குள் 2 மணிநேரம்.. கதறிய 16 வயது சிறுமி”… ஜாதகம் பார்க்கச் சென்ற இடத்தில் ஜோதிடர் செய்த உச்சக்கட்ட கொடூரம்…!

கேரள மாநிலம் கொல்லம் மாவட்டம் அரிக்கல் பகுதியைச் சேர்ந்த பிரபல ஜோதிடர் ராஜன்பாபு (54). ‘முராரி தந்திரி’ என்று அழைக்கப்படும் இவரிடம் ஜாதகம் பார்க்கவும், பரிகார பூஜைகள் செய்யவும் சுற்றுவட்டாரத்தைச் சேர்ந்த ஏராளமான பொதுமக்கள் வருவது வழக்கம். இந்த நிலையில், கொல்லம் புத்தூர் பகுதியைச் சேர்ந்த ஒரு பெண் தனது 16 வயது மகளுடன் ஜாதகம் பார்க்க ராஜன்பாபுவின் ஜோதிட நிலையத்திற்குச் சென்றுள்ளார். அப்போது அந்தச் சிறுமிக்கு பேய் பிடித்துள்ளதாகவும், அதை விரட்ட மந்திரவாதம் மற்றும் சிறப்புப் பூஜைகள் செய்ய வேண்டும் என்றும் ராஜன்பாபு ஆசைவார்த்தை கூறியுள்ளார்.

இதனை நம்பிய சிறுமியின் தாய், கடந்த சில தினங்களுக்கு முன்பு மகளை ஜோதிட நிலையத்திற்கு அழைத்துச் சென்றார். பூஜையின் ஒரு பகுதியாக சிறுமியை மட்டும் ஒரு தனி அறைக்குள் அழைத்துச் சென்ற ராஜன்பாபு, சுமார் இரண்டு மணி நேரத்திற்கும் மேலாகச் சிறுமியை வெளியே விடவில்லை. நீண்ட நேரமாகியும் மகள் வராததால் சந்தேகமடைந்த தாய், அறைக்குள் சென்று பார்த்தபோது சிறுமி அழுதுகொண்டே வெளியே ஓடி வந்துள்ளார். அப்போது நடந்த விவரங்களைக் கேட்டபோது, ஜோதிடர் ராஜன்பாபு தன்னிடம் பாலியல் ரீதியாக அத்துமீறியதாகச் சிறுமி கண்ணீருடன் தெரிவித்துள்ளார்.

இந்த விவகாரம் குறித்து அப்பகுதி மக்கள் திரண்டு ஜோதிட நிலையத்தை முற்றுகையிட்டனர். பொதுமக்களின் கோபத்தைக் கண்ட ராஜன்பாபு, நிலையத்தின் பின்பக்கக் கதவு வழியாகத் தப்பியோடித் தலைமறைவானார். இச்சம்பவம் குறித்து பாதிக்கப்பட்ட தரப்பில் புத்தூர் காவல் நிலையத்தில் புகார் அளிக்கப்பட்டது. புகாரைப் பதிவு செய்த போலீசார், ராஜன்பாபு மீது போக்சோ (POCSO) சட்டத்தின் கீழ் வழக்குப் பதிவு செய்து தீவிரமாகத் தேடி வந்தனர். இறுதியில், பரணிக்காவு கோவிலில் பதுங்கியிருந்த ராஜன்பாபுவை போலீசார் அதிரடியாகக் கைது செய்தனர்.

இந்தச் சம்பவம் கேரளாவில் பெரும் பரபரப்பை ஏற்படுத்தியுள்ளது. தெய்வத்தின் பெயராலும், நம்பிக்கையின் பெயராலும் அப்பாவிப் பெண்களையும் சிறுமிகளையும் ஏமாற்றி இது போன்ற அத்துமீறல்களில் ஈடுபடும் போலிச் சாமியார்கள் மற்றும் ஜோதிடர்கள் மீது கடும் நடவடிக்கை எடுக்கப்பட வேண்டும் எனப் பொதுமக்கள் கோரிக்கை விடுத்துள்ளனர். தற்போது கைது செய்யப்பட்டுள்ள ராஜன்பாபுவிடம் போலீசார் தீவிர விசாரணை நடத்தி வரும் நிலையில், பூட்டப்பட்ட அந்த அறையில் ரத்தக் கறைகள் கண்டறியப்பட்டதாகவும் தகவல்கள் வெளியாகி அதிர்ச்சியை ஏற்படுத்தியுள்ளன.