ஆம்ஸ்ட்ராங் கொலை வழக்கில் பரபரப்பு திருப்பம்… ஹைகோர்ட் போட்ட அதிரடி உத்தரவு….!

பகுஜன் சமாஜ் கட்சியின் முன்னாள் மாநிலத் தலைவர் ஆம்ஸ்ட்ராங் கொலை வழக்கில், 12 பேருக்கு வழங்கப்பட்ட ஜாமீனை ரத்து செய்து சென்னை உயர் நீதிமன்றம் அதிரடி உத்தரவு பிறப்பித்துள்ளது. இந்த உத்தரவைத் தொடர்ந்து, ஜாமீனில் வெளிவந்த 12 பேரும் வரும் மார்ச் 6-ஆம் தேதிக்குள் நீதிமன்றத்தில் சரணடைய வேண்டும் என்று நீதியரசர் கே. ராஜசேகர் உத்தரவிட்டுள்ளார்.

கடந்த 2024-ஆம் ஆண்டு ஜூலை மாதம் பெரம்பூரில் உள்ள தனது வீட்டின் அருகே ஆம்ஸ்ட்ராங் மர்ம கும்பலால் வெட்டிப் படுகொலை செய்யப்பட்டார். இந்த வழக்கில் அஸ்வதாமன் உள்ளிட்ட பலரை காவல்துறையினர் கைது செய்தனர். முன்னதாக, இந்த வழக்கை சிபிஐ (CBI) விசாரணைக்கு மாற்றி உயர் நீதிமன்றம் உத்தரவிட்டிருந்த சூழலில், விசாரணை தற்காலிகமாக முடங்கியுள்ளதைச் சுட்டிக்காட்டி கீழமை நீதிமன்றம் இவர்களுக்கு ஜாமீன் வழங்கியிருந்தது.

இந்த ஜாமீன் உத்தரவை எதிர்த்து ஆம்ஸ்ட்ராங்கின் மனைவி பொற்கொடி சென்னை உயர் நீதிமன்றத்தில் மனுத் தாக்கல் செய்திருந்தார். சிபிஐ விசாரணைக்கு உச்ச நீதிமன்றம் இடைக்காலத் தடை விதித்துள்ள நிலையில், குற்றம் சாட்டப்பட்டவர்கள் வெளியில் இருந்தால் சாட்சிகளைக் கலைக்க வாய்ப்புள்ளதாக அவர் தனது மனுவில் குறிப்பிட்டிருந்தார். தமிழக காவல்துறையும் இவர்களின் ஜாமீனை ரத்து செய்யக் கோரி மேல்முறையீடு செய்திருந்தது.

வழக்கை விசாரித்த நீதிபதி, குற்றத்தின் தீவிரத்தைக் கருத்தில் கொண்டு அஸ்வதாமன், பிரதீப், ஹரிஹரன் உள்ளிட்ட 12 பேரின் ஜாமீனை ரத்து செய்தார். இருப்பினும், இந்த வழக்கில் கைதான அஞ்சலை மற்றும் மலர்க்கொடி ஆகிய இரு பெண்களுக்கு வழங்கப்பட்ட ஜாமீனை ரத்து செய்ய நீதிமன்றம் மறுத்துவிட்டது. இந்த தீர்ப்பு ஆம்ஸ்ட்ராங் கொலை வழக்கில் நீதி கேட்டுப் போராடி வரும் அவரது குடும்பத்தினரிடையே முக்கியத் திருப்பமாகக் கருதப்படுகிறது.