தமிழக அரசியலில் திமுகவின் அசைக்க முடியாத பலமாகப் பார்க்கப்படும் பெண் வாக்காளர்களின் ஆதரவு இந்த முறை மாறியுள்ளதாக ‘ஆக்சிஸ் மை இந்தியா’ எக்ஸிட் போல் முடிவுகள் தெரிவிக்கின்றன. பெண்களின் ஆதரவில் 38 சதவீதத்தைப் பெற்று நடிகர் விஜய்யின் தமிழக வெற்றிக் கழகம் முதலிடத்தைப் பிடித்துள்ளது. திமுக 34 சதவீத ஆதரவுடன் இரண்டாம் இடத்திற்குத் தள்ளப்பட்டுள்ளது.
தமிழகத்தின் அடுத்த முதலமைச்சர் யார் என்ற விருப்பத்திலும் தற்போதைய முதல்வர் மு.க. ஸ்டாலினை (35%) பின்னுக்குத் தள்ளி, 37 சதவீத ஆதரவுடன் விஜய் முதலிடம் பிடித்துள்ளார். பெண்களின் இந்தத் திடீர் மனமாற்றமும், முதல்வர் விருப்பத்தில் விஜய்க்கு கிடைத்துள்ள முன்னிலையும் திமுக மற்றும் அதிமுக ஆகிய இரு பெரும் திராவிடக் கட்சிகளுக்கும் மிகப்பெரிய அதிர்ச்சியைத் தந்துள்ளன.
மே 4-ஆம் தேதி வெளியாகவுள்ள தேர்தல் முடிவுகளில் இந்தப் பெண் வாக்காளர்களின் மனமாற்றம் எந்தளவுக்கு எதிரொலிக்கும் என்பது பெரும் எதிர்பார்ப்பை ஏற்படுத்தியுள்ளது. திராவிடக் கட்சிகளின் கோட்டையாகக் கருதப்படும் பெண் வாக்காளர்களின் வாக்கு வங்கியில் தவெக ஏற்படுத்தியுள்ள இந்தத் தாக்கம் தமிழக அரசியலில் புதிய திருப்பமாகக் கருதப்படுகிறது.