பிரிட்ஜில் காய்கறிகளை வைத்தால் மட்டும் போதாது, அவை செடியிலிருந்து பறிக்கப்பட்ட பிறகும் சுவாசிக்கும் தன்மை கொண்டவை என்பதைப் புரிந்துகொள்வது அவசியம். பழங்கள் மற்றும் காய்கறிகள் இயற்கையாகவே ‘எத்திலீன்’ எனும் வாயுவை வெளியிடுவதால், மற்ற பொருட்களையும் அவை விரைவாகப் பழுக்க வைத்து அழுகச் செய்கின்றன. குறிப்பாக, நீர்ச்சத்து நிறைந்த காய்கறிகளில் பாக்டீரியா மற்றும் பூஞ்சை வளர்ச்சி ஏற்படுவதால் துர்நாற்றமும் அழுகலும் உண்டாகிறது.
பிரிட்ஜில் உள்ள உலர்ந்த காற்று காய்கறிகளில் இருக்கும் ஈரப்பதத்தை உறிஞ்சுவதால் கத்தரிக்காய், வெண்டைக்காய் போன்றவை சுருங்கிப் போகின்றன. மேலும், பிரிட்ஜ் கதவை அடிக்கடி திறக்கும்போது ஏற்படும் வெப்பநிலை மாற்றம் காய்கறிகளின் செல்களுக்கு அழுத்தத்தை அளித்து அவற்றைச் சீக்கிரம் கெட வைக்கிறது. தக்காளி போன்றவற்றை பிரிட்ஜில் வைப்பது அதன் சுவையையே மாற்றிவிடும் என்பதால், சில காய்கறிகளை வெளியிலேயே வைப்பது நல்லது.
காய்கறிகளை நீண்ட நாள் சேமிக்க, பழங்களையும் காய்கறிகளையும் தனித்தனியான டிராயர்களில் வைக்க வேண்டும். கீரை மற்றும் பச்சை இலை காய்கறிகளைப் பேப்பர் டவலில் சுற்றி வைப்பதன் மூலம் அதிகப்படியான ஈரப்பதத்தை நீக்கி பூஞ்சை உருவாவதைத் தடுக்கலாம். காய்கறிகளைச் சேமிக்கும் முன்பு கழுவுவதைத் தவிர்க்க வேண்டும், ஏனெனில் அது ஈரப்பதத்தை அதிகரித்து அழுகுவதை வேகப்படுத்தும். வெங்காயம் மற்றும் உருளைக்கிழங்கை ஒருபோதும் பிரிட்ஜில் வைக்கக் கூடாது.
சரியான காற்றோட்டத்திற்காக பிரிட்ஜில் அதிகப்படியான பொருட்களை அடுக்கி வைக்காமல் இடைவெளி விடுவது அவசியம். பிளாஸ்டிக் கவர்களில் வைப்பதற்குப் பதிலாக கண்ணாடிப் பெட்டிகள் அல்லது தரமான பிளாஸ்டிக் டப்பாக்களைப் பயன்படுத்தலாம். இந்தச் சரியான சேமிப்பு முறைகளைப் பின்பற்றுவதன் மூலம் காய்கறிகளின் ஆயுட்காலத்தை இரண்டு முதல் மூன்று மடங்கு வரை அதிகரித்து, உணவு வீணாவதைத் தவிர்க்க முடியும்.