தமிழக அரசியலில் யாரும் எதிர்பாராத பல திருப்பங்கள் மிக வேகமாக நடந்து வருகின்றன. சமீபத்திய சட்டமன்ற தேர்தலில் நடிகர் விஜய்யின் தமிழக வெற்றிக் கழகம் (தவெக) 107 இடங்களில் வென்று சாதனை படைத்ததோடு, திமுக கூட்டணியில் இருந்த காங்கிரஸ், விசிக, இடதுசாரிகளின் ஆதரவோடு விஜய்யும் முதலமைச்சராக அரியணை ஏறியுள்ளார். இந்த அரசியல் புயலுக்கு மத்தியில், பாஜகவின் முன்னாள் மாநில தலைவரான அண்ணாமலை, கட்சியிலிருந்து விலகி ‘வீ த லீடர்ஸ்’ (We the Leaders) என்ற அமைப்பைத் தொடங்கி தமிழக அரசியலில் ஒரு புதிய அதிர்வலையை ஏற்படுத்தியுள்ளார். தற்போது இந்த அமைப்பில் 16 லட்சத்திற்கும் அதிகமானோர் இணைந்துள்ளது தமிழக அரசியல் களத்தை உற்று நோக்க வைத்துள்ளது.
கடந்த தேர்தலில் 4 தொகுதிகளில் வென்றிருந்த பாஜக, இந்த முறை வெறும் 1 தொகுதியில் மட்டுமே வென்று பலத்த சரிவைச் சந்தித்துள்ளது. இந்த தோல்விக்கு பின்னணியில் அதிமுக பொதுச்செயலாளர் எடப்பாடி பழனிசாமியின் தந்திரமான அரசியல் நகர்வுகளே காரணம் என்று சொல்லப்படுகிறது. அண்ணாமலை தலைவராக இருந்தபோது எடப்பாடி பழனிசாமியை தனிநபர் ரீதியாகவும், அரசியல் ரீதியாகவும் கடுமையாக விமர்சித்தார். இதற்குப் பழிவாங்கும் நோக்கில், தேர்தல் கூட்டணியின் போது கடந்த முறை பாஜக வென்ற தொகுதிகளைக் கொடுக்காமல், மாற்றுத் தொகுதிகளை ஒதுக்கீடு செய்து வானதி சீனிவாசன், நயினார் நாகேந்திரன் போன்ற முக்கிய தலைவர்களின் தோல்விக்கு எடப்பாடி பழனிசாமி ஸ்கெட்ச் போட்டதாக அரசியல் வட்டாரங்கள் பேசுகின்றன.
குறிப்பாக, அண்ணாமலை தேர்தல் அரசியலுக்குள் நுழைந்துவிடக் கூடாது என்பதில் எடப்பாடி பழனிசாமி மிகவும் பிடிவாதமாக இருந்ததால், அண்ணாமலைக்கு போட்டியிட சீட் மறுக்கப்பட்டது. மாநில பாஜக தனக்குத் துரோகம் செய்துவிட்டதாகக் கருதிய அண்ணாமலை, ஆளுநர் போன்ற பதவிகளை எதிர்பார்த்தார். ஆனால், தேசிய தலைமையிடமிருந்தும் சாதகமான பதில் வராததால், நேரடியாக டெல்லி சென்று அமித்ஷா, மோடி ஆகியோரைச் சந்தித்து தனது ராஜினாமாவை உல்டாவாக அறிவித்துவிட்டுத் தமிழகம் திரும்பினார். அதன் பின்னரே, தனது ‘வீ த லீடர்ஸ்’ அமைப்பைத் தீவிரமாகப் பலப்படுத்தும் பணிகளில் அவர் இறங்கினார்.
தொடக்கத்தில் அண்ணாமலையின் இந்த அதிரடி முடிவு பாஜகவுக்குத்தான் பெரும் இழப்பை ஏற்படுத்தும் என்று கணிக்கப்பட்டது. அண்ணாமலையின் தீவிர ஆதரவாளர்கள் பலர் பாஜகவிலிருந்து விலகி இந்த அமைப்பில் இணைந்தனர். ஆனால், தற்போதைய கள நிலவரப்படி இது பாஜகவுக்கு வைக்கப்பட்ட செக் கிடையாது, மாறாக அதிமுகவின் வாக்கு வங்கியை ஒட்டுமொத்தமாகப் பிரிப்பதற்கான ஒரு மாபெரும் அரசியல் திட்டம் என்பது வெளிச்சத்திற்கு வந்துள்ளது. இதனால் தற்போதைய சூழலில் எடப்பாடி பழனிசாமி கடும் அதிருப்தியிலும் கவலையிலும் ஆழ்ந்துள்ளதாகக் கூறப்படுகிறது.
அதிமுகவின் எஃகு கோட்டையாகக் கருதப்படும் கிருஷ்ணகிரி, சேலம், நாமக்கல், ஈரோடு, கோவை, திருப்பூர் மற்றும் கரூர் உள்ளிட்ட கொங்கு பெல்ட் பகுதியில் உள்ள அதிமுக ஆதரவாளர்கள் பலரே தற்போது ‘வீ த லீடர்ஸ்’ அமைப்பில் பெருமளவில் இணைந்து வருகின்றனர். தங்களது பெற்றோர் தீவிர அதிமுக தொண்டர்களாக இருக்கும் வீடுகளில் உள்ள இளம் தலைமுறையினர், அண்ணாமலையின் அமைப்பில் இணைந்து அதனைத் தங்களது வாட்ஸ்அப் ஸ்டேட்டஸாக வைத்துப் பெருமைப்பட்டு வருகின்றனர். இதையெல்லாம் பார்க்கும்போது, அதிமுகவின் வாக்கு வங்கியைத் திசைதிருப்பி, எடப்பாடி பழனிசாமியின் அரசியல் செல்வாக்கைச் சரிப்பதற்காகவே பாஜக தேசிய தலைமை அண்ணாமலையை இந்த புதிய வடிவில் களமிறக்கியுள்ளதோ என்ற பலத்த சந்தேகம் அரசியல் விமர்சகர்கள் மத்தியில் எழுந்துள்ளது.