அண்ணாமலை போட்ட வெடி…. ‘தவெக’ அரசுக்கு வந்த முதல் பெரிய நெருக்கடி…. விஜய்க்கு காத்திருக்கும் அடுத்த சிக்கல்….!

தமிழகத்தில் ஆட்சி மாற்றம் ஏற்பட்டு ‘தவெக’ அரசு அமைந்த பின்னரும், விவசாயிகளின் கோரிக்கைகள் முழுமையாக நிறைவேற்றப்படாதது மிகுந்த ஏமாற்றமளிப்பதாக ‘வீ தி லீடர்ஸ்’ அமைப்பின் நிறுவனர் அண்ணாமலை தனது அறிக்கையில் சுட்டிக்காட்டியுள்ளார். 5 ஏக்கர் வரை நிலம் வைத்திருக்கும் விவசாயிகளின் கூட்டுறவுப் பயிர்க் கடன்கள் முழுமையாகத் தள்ளுபடி செய்யப்படும் என்ற தேர்தல் வாக்குறுதியை நம்பியே மக்கள் இந்த அரசைத் தேர்ந்தெடுத்தனர். ஆனால், தற்போது வெறும் 75,000 ரூபாய் வரையிலான கடன் மட்டுமே தள்ளுபடி செய்யப்படும் என்று அரசு அறிவித்துள்ளது விவசாயிகளிடையே பெரும் அதிர்ச்சியை ஏற்படுத்தியுள்ளது. இந்த வாக்குறுதி மீறலைக் கண்டித்து, சேலம் ஆட்சியர் அலுவலகம் முன்பாக விவசாயிகள் தங்களைச் சாட்டையால் அடித்துக் கொண்டு நடத்திய போராட்டம், அவர்களின் வேதனையையும் ஆத்திரத்தையும் வெளிப்படுத்துவதாக அவர் குறிப்பிட்டுள்ளார்.

கடந்த கால வரலாற்றை நினைவு கூர்ந்த அண்ணாமலை, 1970ஆம் ஆண்டு இதே நாளில் மின் கட்டண உயர்வை எதிர்த்துப் போராடிய விவசாயிகள் மீது துப்பாக்கிச் சூடு நடத்தப்பட்டு மூன்று பேர் கொல்லப்பட்ட துயரச் சம்பவத்தை ஒப்பிட்டுப் பேசியுள்ளார். 56 ஆண்டுகள் கடந்த பின்னரும், அதே நாளில் விவசாயிகள் தங்களது உரிமைகளுக்காக தங்களைத்தாங்களே வருத்திக் கொள்ளும் அவல நிலை தொடர்வது துரதிர்ஷ்டவசமானது என்றும், முந்தைய ஆட்சியைப் போலவே தவெக அரசும் பெயரில் மட்டுமே மாற்றத்தைக் காட்டி மக்களை ஏமாற்றக் கூடாது என்றும் அவர் வலியுறுத்தியுள்ளார். எனவே, தமிழக அரசு உடனடியாகத் தனது தேர்தல் வாக்குறுதியை முழுமையாக நிறைவேற்றி, 5 ஏக்கர் வரை நிலம் வைத்துள்ள விவசாயிகளின் பயிர்க்கடனை எவ்வித நிபந்தனையுமின்றி முழுமையாகத் தள்ளுபடி செய்ய வேண்டும் என அவர் தனது அறிக்கையில் வலியுறுத்திக் கேட்டுக்கொண்டுள்ளார்.