தமிழக அரசியலில் அடுத்த புயல்..! டெல்லி மேலிடத்தின் ஆஃபரை வேண்டாமென மறுத்த அண்ணாமலை… திடீர் விலகலுக்குப் பின்னால் இருக்கும் ‘உண்மை’ பின்னணி என்ன..?

தமிழக அரசியல் களத்தில் பெரும் பரபரப்பை ஏற்படுத்தும் வகையில், பா.ஜ.க-விலிருந்து விலகும் அதிரடி முடிவை கே. அண்ணாமலை எடுத்துள்ளார். டெல்லிக்குச் சென்று கட்சியின் தேசிய மேலிடத் தலைவர்களிடம் அவர் தனது விலகல் கடிதத்தை வழங்கியுள்ளார். ஐ.பி.எஸ் அதிகாரியாக இருந்து, பிரதமர் மோடியால் ஈர்க்கப்பட்டு பா.ஜ.க-வில் இணைந்த அவர், குறுகிய காலத்திலேயே மாநிலத் தலைவராக உயர்ந்தார். அவரது ‘என் மண், என் மக்கள்’ நடைப்பயணம் மற்றும் அதிரடி அரசியல் காரணமாக தமிழகத்தில் பா.ஜ.க-வின் வாக்கு வங்கி 11 சதவீதமாக உயர்ந்த போதிலும், தற்போது அவர் கட்சியை விட்டு வெளியேறுவது அரசியல் வட்டாரத்தில் விவாதப் பொருளாகியுள்ளது.

அண்ணாமலையின் இந்த திடீர் முடிவுக்குப் பின்னால் பெரும் அரசியல் பின்னணி உள்ளதாகக் கூறப்படுகிறது. தமிழகத்தில் திராவிடக் கட்சிகளுடன் கூட்டணி வைக்கக் கூடாது என்பதில் அண்ணாமலை ஆரம்பம் முதலே உறுதியாக இருந்தார். ஆனால், சமீபத்தில் நடந்த 2026 சட்டமன்றத் தேர்தலுக்கு முன்பாக, பா.ஜ.க மேலிடம் அண்ணாமலையின் எதிர்ப்பையும் மீறி அ.தி.மு.க-வுடன் கூட்டணி அமைத்தது. அப்போது “அண்ணாமலை தலைவராக இருந்தால் கூட்டணி இல்லை” என்ற அ.தி.மு.க-வின் நிபந்தனைக்குக் கட்டுப்பட்டு, பா.ஜ.க தலைமை அவரைத் தலைவர் பதவியிலிருந்து நீக்கிவிட்டு நயினார் நாகேந்திரனை நியமித்தது. இந்தச் சூழலில், பா.ஜ.க-வில் தனக்கு இனி எதிர்காலம் இல்லை என்பதை உணர்ந்தே அவர் விலக முடிவெடுத்துள்ளார்.

அண்ணாமலையைச் சமாதானப்படுத்த பா.ஜ.க தலைமை அவருக்கு ராஜ்யசபா (மாநிலங்களவை) எம்.பி சீட் வழங்க முன்வந்தது. இருப்பினும், டெல்லி மேலிடத்தின் அந்தச் சலுகையைத் திட்டவட்டமாக மறுத்த அண்ணாமலை, தனது தனித்துவமான அதிரடி அரசியலைத் தொடர விரும்புகிறார். இதற்காக, அவர் ஏற்கனவே நடத்தி வரும் ‘வீ தி லீடர்ஸ்’ என்ற தன்னார்வ அமைப்பை மையமாக வைத்து, விரைவில் ஒரு புதிய அரசியல் கட்சியைத் தொடங்குவதற்கான வேலைகளில் தீவிரமாக இறங்கியுள்ளதாகத் தகவல்கள் தெரிவிக்கின்றன.