“கமல், கார்த்திக் கூடதான் கட்சி ஆரம்பிச்சாங்க.. என்னாச்சு?”…. அண்ணாமலை எல்லாம் ஒரு ஆளே இல்லை… மேடையில் நறுக்கென்று பொரிந்து தள்ளிய தவெக எம்.எல்.ஏ முஸ்தபா…!

தமிழக அரசியல் களம் தற்போது ஆளுங்கட்சியான திமுக மற்றும் முதலமைச்சர் விஜய்யின் ‘தமிழக வெற்றிக் கழகம்’ (தவெக) ஆகிய இரு கட்சிகளுக்கு இடையேயான இருதுருவப் போட்டியாக மாறியுள்ளதாக மதுரை மத்திய தொகுதி தவெக எம்.எல்.ஏ முஸ்தபா தெரிவித்துள்ளார். பா.ஜ.க-விலிருந்து விலகி அண்ணாமலை தனிக்கட்சி தொடங்கியுள்ளது குறித்துப் பேசிய அவர், பாஜகவில் இடமும் அங்கீகாரமும் இல்லாத நிலையில்தான் அண்ணாமலை இந்த முடிவை எடுத்துள்ளார் என்றார். முன்பு நடிகர்கள் கமல்ஹாசன், மன்சூர் அலிகான், கார்த்திக் போன்றோர் கட்சி தொடங்கியபோது மக்கள் ஏற்றுக்கொள்ளாததைச் சுட்டிக்காட்டிய அவர், அண்ணாமலையின் இயக்கம் தவெக போன்ற மாபெரும் சக்தியுடன் ஒப்பிடுவதற்குரிய ஒரு பெரிய விஷயமே அல்ல என்றும், தமிழகத்தில் பாஜக என்பது வெறும் மாயை என்றும் நறுக்கென்று பதிலடி கொடுத்துள்ளார்.

திமுகவின் தற்போதைய அரசியல் நகர்வுகளைக் கடுமையாக விமர்சித்த முஸ்தபா எம்.எல்.ஏ, திமுகவிற்கும் பாஜகவிற்கும் இடையே திரைமறைவில் கள்ளக்கூட்டணி இருப்பதாகப் பகிரங்கக் குற்றச்சாட்டை முன்வைத்துள்ளார். திமுகவிற்கு ஏதேனும் ஒரு பிரச்சனை என்றால் டெல்லிக்கு ஓடிச் சென்று பாஜகவிடம் அடிமை சாசனம் எழுதித் தருவதாகவும், ஆர்.எஸ்.எஸ் மற்றும் பாஜகவைக் கண்டு திமுக பயப்படுவதாகவும் அவர் கூறினார். மறைந்த முன்னாள் முதல்வர் கருணாநிதியின் நாணயம் வெளியீட்டு விழாவிற்கு ஆர்.எஸ்.எஸ் அமைப்பினரை அழைத்தது மற்றும் திமுகவினர் மைசூருக்குச் சென்று ஆர்.எஸ்.எஸ் நிர்வாகிகளைச் சந்திப்பது போன்ற நிகழ்வுகள் இதனை உறுதிப்படுத்துவதாகவும், இன்னும் ஓரிரு மாதங்களில் திமுக வெளிப்படையாகவே பாஜக அமைச்சரவையில் சேர்ந்தாலும் ஆச்சரியப்படுவதற்கில்லை என்றும் அவர் சாடியுள்ளார்.

மறுபுறம், எடப்பாடி பழனிசாமியின் தலைமையின் கீழ் அதிமுக முற்றிலுமாக அழிந்துவிட்டதாக முஸ்தபா விமர்சித்துள்ளார். முன்னாள் முதல்வர் ஜெயலலிதா ‘மோடியா லேடியா’ என்று கம்பீரமாகத் தனித்து நின்று வென்றார், ஆனால் எடப்பாடி பழனிசாமியோ தன்னை மட்டுமே முன்னிறுத்தி அனைத்துத் தேர்தல்களிலும் தோல்வியைத் தழுவினார் என்றார். இதனால் விரக்தியடைந்த அதிமுகவினர், திமுகவை வீழ்த்த விஜய் தான் சரியான தலைவர் என்பதைப் புரிந்து கொண்டு கொத்து கொத்தாக தவெக-வில் இணைந்து வருவதாகவும், இதன் காரணமாக வரும் 2031 தேர்தலில் எதிர்க்கட்சியே இல்லாத சட்டமன்றம் அமைய வாய்ப்புள்ளது என்றும் அவர் கணித்துள்ளார்.

சுதந்திர இந்தியாவிற்குப் பிறகு இஸ்லாமியர்களுக்கும் பட்டியலின மக்களுக்கும் ஆட்சியில் முறையான அங்கீகாரமும், அமைச்சரவையில் உரிய இடமும் கொடுத்தவர் தவெக தலைவர் விஜய் மட்டும்தான் என்று முஸ்தபா பெருமிதம் தெரிவித்தார். “ஆட்சியில் பங்கு, அதிகாரத்தில் பங்கு” என்ற தேர்தல் வாக்குறுதியை முதலமைச்சர் விஜய் 100 சதவீதம் நிறைவேற்றியுள்ளார் என்று பாராட்டிய அவர், இத்தனை காலம் திமுக இஸ்லாமியர்களை வெறும் ஓட்டு வங்கியாக மட்டுமே பயன்படுத்தி ஏமாற்றி வந்துள்ளதாகக் குற்றம் சாட்டினார். மேலும், அடிமட்டத்திலிருந்து வந்த தவெக அமைச்சர்களும் எம்.எல்.ஏ-க்களும் பாரம்பரிய மிட்டா மிராசுகள் கிடையாது என்பதால், அவர்கள் களத்தில் இறங்கி பாதாள சாக்கடைப் பிரச்சனைகள் உள்ளிட்ட மக்கள் குறைகளைத் தொடர்ந்து ஆய்வு செய்து சரிசெய்து வருவதாகக் கூறி, தமிழ்நாட்டு மக்கள் திமுகவின் நாடகத்தை முடிவுக்குக் கொண்டுவரத் தயாராகிவிட்டனர் என்று அவர் முடித்தார்.