அரசுப் பள்ளி மாணவர்களை ஊக்கப்படுத்தும் வகையில், தமிழக பள்ளிக்கல்வித் துறை சார்பில் ஆண்டுதோறும் சிறந்த மாணவர்கள் வெளிநாடுகளுக்குக் கல்விச் சுற்றுலா அழைத்துச் செல்லப்படுகின்றனர். அந்த வகையில், இந்த ஆண்டு மலேசியாவுக்குக் கல்விச் சுற்றுலா செல்லவிருக்கும் மாணவர்களுடன் கலந்துரையாடிய அமைச்சர் அன்பில் மகேஷ், பெற்றோர்களின் கவலையைப் போக்கும் வகையில் மிக உருக்கமான ஒரு கருத்தைப் பகிர்ந்துள்ளார்.
“மலேசியாவுக்குக் கல்விச் சுற்றுலா செல்லக்கூடிய மாணவர்கள் தனியாக இருக்கிறார்களே என்று பெற்றோர்கள் கவலைப்பட வேண்டாம். அந்த நான்கு நாட்களும் அவர்களுக்கு நான்தான் அப்பா, நான்தான் அம்மா. அவர்களின் பாதுகாப்பிற்கும், தேவைகளுக்கும் நானே பொறுப்பு,” என்று அமைச்சர் உறுதியளித்தார். அமைச்சரின் இந்தத் தந்தைவழிப் பேச்சு அங்கிருந்த மாணவர்களையும் பெற்றோர்களையும் நெகிழ்ச்சியில் ஆழ்த்தியது.