மத்திய கிழக்கில் அமெரிக்கா, இஸ்ரேல் மற்றும் ஈரான் இடையே போர் உச்சகட்டத்தை எட்டியுள்ள நிலையில், தற்போது சீனா இந்த விவகாரத்தில் ஒரு முக்கிய மத்தியஸ்தராகக் களமிறங்கியுள்ளது. ஆரம்பத்தில் ஈரானின் உள்நாட்டு விவகாரங்களில் அமெரிக்கா தலையிடுவதற்கு கடும் கண்டனம் தெரிவித்த சீனா, தற்போது போர் நிறுத்தத்திற்கான அமைதிப் பேச்சுவார்த்தையில் உதவ முன்வந்துள்ளது. ஈரானின் இறையாண்மை மதிக்கப்பட வேண்டும் என்று வலியுறுத்திய சீன அதிபர் ஷி ஜின்பிங், தற்போது அமெரிக்காவுடன் இணைந்து ஒரு தீர்வை எட்ட விரும்புவது சர்வதேச அரசியலில் ஒரு முக்கிய மாற்றமாகப் பார்க்கப்படுகிறது.
அமெரிக்க அதிபர் டிரம்ப், ஈரானின் மின் கட்டமைப்புகளை அழிப்போம் என எச்சரித்த போதிலும், பின்னர் திடீரென 10 நாட்களுக்குத் தாக்குதலை நிறுத்தி வைப்பதாக அறிவித்தார். இந்தத் தற்காலிகப் போர் நிறுத்தத்தின் பின்னணியில் ஈரானுடனான ரகசியப் பேச்சுவார்த்தைகள் இருப்பதாகக் கூறப்பட்டாலும், சீனாவின் தலையீடு இதில் மிக முக்கியப் பங்கு வகிக்கிறது. குறிப்பாக, ஹார்முஸ் ஜலசந்தி முடக்கப்பட்டதால் ஏற்பட்டுள்ள உலகளாவிய எரிபொருள் தட்டுப்பாடு மற்றும் கச்சா எண்ணெய் விலை உயர்வு ஆகியவை சீனாவின் பொருளாதாரத்தையும் பாதித்துள்ளதால், அமைதி திரும்புவதை சீனா உறுதி செய்ய விரும்புகிறது.
முன்னதாக, போர் காரணமாகத் தள்ளிவைக்கப்பட்டிருந்த டிரம்ப்பின் சீனப் பயணம், தற்போது மே மாதம் 14, 15 ஆகிய தேதிகளில் நடைபெறும் என வெள்ளை மாளிகை அதிகாரப்பூர்வமாக அறிவித்துள்ளது. டிரம்ப் பீஜிங் செல்லவிருக்கும் இந்த அறிவிப்பு வெளியான உடனேயே, ஈரான் உடனான போரில் மத்தியஸ்தம் செய்யத் தயார் என்கிற அறிவிப்பைச் சீனா வெளியிட்டுள்ளது. இதன் மூலம் அமெரிக்கா மற்றும் சீனா ஆகிய இரு வல்லரசு நாடுகளும் இணைந்து மத்திய கிழக்கில் நிலவும் போர்ப் பதற்றத்தைத் தணிக்க ஒரு பொதுவான புள்ளியில் இணைய வாய்ப்புள்ளதாகத் தெரிகிறது.
சீனாவின் இந்த மத்தியஸ்த முயற்சி எந்த அளவிற்கு வெற்றியடையும் என்பது ஈரானின் பிடிவாதத்தைப் பொறுத்தே அமையும். ஒருபுறம் அமெரிக்காவின் மிரட்டல், மறுபுறம் சீனாவின் சமாதான ஆஃபர் என ஈரான் தற்போது ஒரு இக்கட்டான சூழலில் உள்ளது. ஈரானின் எண்ணெய் உள்கட்டமைப்புகளைத் தாக்காமல் அமெரிக்கா தற்காலிகமாகப் பின்வாங்கியுள்ள நிலையில், சீனாவின் தலையீடு ஒரு நிரந்தரப் போர் நிறுத்தத்திற்கு வழிவகுக்குமா அல்லது இது வெறும் கால அவகாசத்தைப் பெறுவதற்கான ஒரு ராஜதந்திர நகர்வா என்பது வரும் வாரங்களில் தெரியவரும்.