வாஸ்து காரணமா?… சீக்ரெட் பிளானா?… உச்சத்தில் இருக்க உயரமான இடத்தில் அலுவலகம்… முதல்வர் விஜய்யின் “மாஸ்” ஆபீஸ் டிரான்ஸ்ஃபர்…!

தமிழகத்தில் நடைபெற்ற தேர்தலில் வெற்றி பெற்று தமிழக வெற்றிக் கழகத்தின் தலைவர் விஜய் முதலமைச்சராகப் பொறுப்பேற்றார். அதிரடி மாற்றங்களுடன் இயங்கி வரும் இந்த ஆட்சியில், தற்போது புனித ஜார்ஜ் கோட்டை வளாகத்தில் சுமார் 60 ஆண்டுகால வரலாற்றைக் கொண்ட பிரதான கட்டிடத்தின் முதல் தளத்தில் இயங்கி வந்த முதலமைச்சரின் அலுவலகம், 10 அடுக்கு மாடிகளைக் கொண்ட நாமக்கல் கவிஞர் மாளிகையின் 10-வது தளத்திற்கு மாற்றப்பட உள்ளது. அங்கு முதலமைச்சரின் அறையுடன் அவரது 4 முதன்மைச் செயலாளர்களின் அறைகளும் அமையவுள்ளன.

மாவட்ட ஆட்சியர்கள் மற்றும் காவல் கண்காணிப்பாளர்கள் மாநாடு நடைபெற்று வந்த அரங்கம், தற்போது சர்வதேச தரத்திலான புதிய அலுவலகமாக மாற்றப்படுகிறது. கடல் காட்சியை ரசிக்கும் வகையிலான அமைதி தரும் சூழல், 34 அரசுத் துறைகளின் முதன்மைச் செயலாளர்கள் அதே கட்டிடத்தில் இருப்பதால் அவர்களுடன் நேரடியாகத் தொடர்புகொண்டு பணிகளை விரைவுபடுத்தும் வசதி ஆகியவை இதன் முக்கிய சிறப்புகளாகும். தகவல், தமிழ் வளர்ச்சி மற்றும் வணிக வரித் துறையின் சில பிரிவுகள் வேறு இடங்களுக்கு மாற்றப்பட்டு, ஆகஸ்ட் மாத இறுதிக்குள் இந்த இடமாற்றம் நிறைவடையும் எனக் கூறப்படுகிறது.

அலுவலகம் உச்சத்தில் இருந்தால் ஆட்சியும் உச்சத்தில் இருக்கும் என்ற ஜோதிட / வாஸ்து ரீதியான காரணங்கள் ஒருபுறம் பேசப்பட்டாலும், தலைமைச் செயலகத்தில் நிலவும் இடநெருக்கடி மற்றும் முதலமைச்சரைச் சந்திக்க வரும் பார்வையாளர்களின் எண்ணிக்கை அதிகரிப்பு ஆகியவையே இம்மாற்றத்திற்கான முக்கியக் காரணங்களாகக் சுட்டிக்காட்டப்படுகின்றன. இருப்பினும், பிரதான கட்டிடத்தில் உள்ள பழைய அலுவலகத்தையும் முதலமைச்சர் தொடர்ந்து பயன்படுத்துவார் என்று தெரிவிக்கப்பட்டுள்ளது.