பெங்களூருவில் பட்டாசு வெடிப்பதில் ஏற்பட்ட தகராறில், முதியவர் ஒருவர் பெண்ணைத் தள்ளியதில் அவர் கீழே விழுந்து ஸ்ட்ரெச்சரில் அழைத்துச் செல்லப்படும் வீடியோ சமூக வலைதளங்களில் வைரலாகி பரபரப்பை ஏற்படுத்தியுள்ளது.
தீபாவளி கொண்டாட்டத்தின் போது குடியிருப்பு பகுதியில் பட்டாசு வெடிப்பது தொடர்பாக அண்டை வீட்டாருக்கு இடையே கடுமையான வாக்குவாதம் ஏற்பட்டுள்ளது. இந்த சம்பவத்தை வீடியோ எடுத்த வாலிபர், தங்களையும் தங்களது சகோதரிகளையும் அண்டை வீட்டார்கள் மிரட்டுவதாகக் குற்றம் சாட்டியுள்ளார். வாக்குவாதம் முற்றிய நிலையில், அங்கிருந்த முதியவர் ஒருவர் அந்த வாலிபரின் சகோதரியை பலமாகத் தள்ளியுள்ளார். இதில் அந்த பெண் நிலைகுலைந்து கீழே விழுந்ததைத் தொடர்ந்து, அவர் ஸ்ட்ரெச்சரில் படுக்க வைக்கப்பட்டு ஆம்புலன்ஸ் போன்ற வாகனத்தில் மருத்துவமனைக்கு அழைத்துச் செல்லப்பட்டார். இது தொடர்பான மருத்துவமனை ஆவணங்களையும் அந்த வாலிபர் பகிர்ந்துள்ளார்.
இந்த வீடியோ சமூக வலைதளங்களில் வைரலானதை அடுத்து, பெங்களூரு நகர காவல்துறை இதற்குப் பதிலளித்துள்ளது. இந்த விவகாரம் குறித்து உரிய நடவடிக்கை எடுக்குமாறு துணை போலீஸ் கமிஷனர், உதவி கமிஷனர் மற்றும் சம்பந்தப்பட்ட யலஹங்கா உள்ளூர் காவல் நிலையத்திற்குத் தகவல் தெரிவிக்கப்பட்டுள்ளதாகப் போலீசார் கூறினர். இதற்கிடையில், இந்த பிரச்சனை சுமூகமாகத் தீர்க்கப்பட்டுவிட்டதாகவும், உடனடி நடவடிக்கை எடுத்த கர்நாடக காவல்துறைக்கு நன்றி தெரிவிப்பதாகவும் அந்த வாலிபர் பின்னர் மற்றொரு வீடியோ மூலம் தெரிவித்துள்ளார்.