அடுத்தடுத்து சந்தித்த தேர்தல் தோல்விகள், கட்சியின் முக்கிய முன்னாள் அமைச்சர்கள் மற்றும் நிர்வாகிகள் மாற்று முகாமிற்கு மாறுவது என அதிமுக தற்போது கடுமையான அரசியல் நெருக்கடிக்கு ஆளாகியுள்ளது. குறிப்பாக, அண்மையில் நடந்து முடிந்த 2026 சட்டமன்றத் தேர்தலிலும் பின்னடைவைச் சந்தித்த நிலையில், தமிழக வெற்றிக் கழகத்தின் (தவெக) அசுர வளர்ச்சி அதிமுகவை மேலும் ஆட்டம்காணச் செய்துள்ளது. தற்போதைய எம்.எல்.ஏ-க்கள் மற்றும் மாவட்ட செயலாளர்கள் சிலர் தவெக-வை நோக்கி நகர்வதாக வெளியாகும் தகவல்கள், கட்சியின் பொதுச்செயலாளர் எடப்பாடி பழனிசாமிக்கு (இபிஎஸ்) கூடுதல் தலைவலியை ஏற்படுத்தியிருக்கிறது.
இந்த இக்கட்டான சூழலில், திராவிட அரசியல் வரலாற்றில் யாரும் எதிர்பார்க்காத ஒரு திருப்பமாக, டிடிவி தினகரனின் அமமுகவை மீண்டும் அதிமுகவுடன் இணைக்க வேண்டும் என்ற குரல் கட்சியின் உள்ளிருந்தே ஒலிக்கத் தொடங்கியுள்ளது. “திமுகவும் அதிமுகவும் கூட கூட்டணி வைக்கலாம்” என டிடிவி தினகரன் அண்மையில் பேசியதை சுட்டிக்காட்டும் அதிமுக சீனியர்கள், அப்படி இருக்கும்போது ரத்தமும் சதையுமான அமமுகவை ஏன் அதிமுகவுடன் இணைக்கக் கூடாது என்ற கேள்வியை எழுப்புகின்றனர். தவெக-வின் அரசியல் வியூகங்களை எதிர்கொள்ள இந்த இணைப்பு அவசியம் என்பதே அவர்களின் வாதமாக உள்ளது.
குறிப்பாக, டெல்டா மற்றும் தென் மாவட்டங்களில் சசிகலா மற்றும் டிடிவி தினகரனுக்கு இருக்கும் வாக்கு வங்கியை அதிமுக சீனியர்கள் சுட்டிக்காட்டுகின்றனர். கடந்த காலத் தேர்தல்களில் சசிகலா ஆதரவு வேட்பாளர்கள் சில தொகுதிகளில் கணிசமான வாக்குகளைப் பெற்று இரண்டாம் இடத்தைப் பிடித்ததை நினைவுகூரும் அவர்கள், அமமுகவுடன் இணைந்தால் வாக்குகள் சிதறாமல் மீண்டும் ‘இரட்டை இலை’ சின்னத்திற்கே கிடைக்கும் என நம்புகின்றனர். “கட்சியை சசிகலாவும் தினகரனும் பார்த்துக்கொள்ளட்டும், ஆட்சியை நாம் பார்த்துக்கொள்ளலாம்” என்ற அதிகாரப் பகிர்வு ஒப்பந்த சூத்திரத்தையும் இபிஎஸ் முன் அவர்கள் வைத்துள்ளதாகத் தெரிகிறது.
தற்போது அமமுகவுடன் கூட்டணியில் இருக்கும் நிலையில், கட்சியை முழுமையாக இணைக்க வேண்டிய அவசியமில்லை என தினகரன் கூறி வந்தாலும், வரவிருக்கும் இடைத்தேர்தல் களம் இந்தச் சூழலை மாற்றலாம் என எதிர்பார்க்கப்படுகிறது. தவெக-வின் எழுச்சிக்கு மத்தியில், இடைத்தேர்தலில் சசிகலாவின் ஆசியோடு களம் கண்டால் மட்டுமே சில தொகுதிகளையாவது தக்கவைக்க முடியும் என்பது அதிமுக சீனியர்களின் கணக்காக உள்ளது. எனினும், சசிகலா மற்றும் தினகரனை மீண்டும் கட்சிக்குள் சேர்க்க எடப்பாடி பழனிசாமி உடன்படுவாரா அல்லது தனது தனித்துவமான தலைமையையே தொடர்ந்து தக்கவைப்பாரா என்பதுதான் தற்போதைய தமிழக அரசியலின் மில்லியன் டாலர் கேள்வி.