தமிழக அரசியல் களத்தில் கூட்டணிக் கணக்குகள் சூடுபிடிக்கத் தொடங்கியுள்ள நிலையில், அதிமுக பொதுச்செயலாளர் எடப்பாடி பழனிசாமி முன்னிலையில் அடுத்தடுத்த ஆதரவு சந்திப்புகள் நிகழ்ந்து வருகின்றன. ஏற்கனவே அகில இந்திய பார்வர்டு பிளாக் கட்சி அதிமுகவுக்கு தனது ஆதரவை உறுதி செய்திருந்த நிலையில், நேற்று இரவு மருது தேசிய கழகமும் அதிமுகவுடனான கூட்டணியை அதிகாரப்பூர்வமாக உறுதி செய்துள்ளது. அக்கட்சியின் நிறுவனத் தலைவர் மருது பாண்டியன், சென்னை பசுமை வழிச்சாலையில் உள்ள எடப்பாடி பழனிசாமியின் இல்லத்திற்கு நேரில் சென்று தனது ஆதரவை தெரிவித்தார்.
இந்த முக்கியத்துவம் வாய்ந்த சந்திப்பிற்கு முன்னாள் அமைச்சர் ராஜேந்திர பாலாஜி முன்னின்று ஏற்பாடுகளைச் செய்திருந்தார். சந்திப்பின் போது மருது பாண்டியனுக்கு பூங்கொத்து கொடுத்து எடப்பாடி பழனிசாமி உற்சாகமாக வரவேற்பு அளித்தார். வரவிருக்கும் தேர்தலை முன்னிட்டு சிறு மற்றும் மாநிலக் கட்சிகளை ஒருங்கிணைப்பதில் அதிமுக தீவிரம் காட்டி வரும் சூழலில், மருது தேசிய கழகத்தின் இந்த வருகை அக்கட்சிக்கு கூடுதல் பலமாக அமையும் என்று எதிர்பார்க்கப்படுகிறது.