தமிழக அரசியலில் கடந்த சில நாட்களாக பெரும் விவாதப் பொருளாக இருந்த காங்கிரஸ் கட்சியின் “ஆட்சியில் பங்கு” என்ற கோரிக்கை தற்போது முடிவுக்கு வந்துள்ளது. 2026 சட்டமன்றத் தேர்தலை முன்னிட்டு திமுக கூட்டணியில் நீடிப்பதில் நிலவி வந்த இழுபறி, டெல்லியில் இருந்து வந்த காங்கிரஸ் பொதுச்செயலாளர் கே.சி. வேணுகோபால் மற்றும் முதல்வர் மு.க. ஸ்டாலின் இடையிலான 45 நிமிடச் சந்திப்பிற்குப் பிறகு சுமுகமாக முடிவடைந்துள்ளது. இந்த சந்திப்பில் காங்கிரஸ் கட்சி தனது அதிகாரப் பகிர்வு கோரிக்கையைத் தற்காலிகமாகத் திரும்பப் பெற்றுள்ளதாகத் தகவல்கள் வெளியாகியுள்ளன.
கூட்டணிப் பேச்சுவார்த்தையின் போது, “ஆட்சியில் அதிகாரம் வேண்டும்” என்பதில் காங்கிரஸ் தரப்பு பிடிவாதமாக இருந்தது. இது திமுக தலைமைக்கு ஒருவித நெருக்கடியை ஏற்படுத்திய நிலையில், முதல்வர் ஸ்டாலின் தனது நிலைப்பாட்டில் மிகவும் உறுதியாக இருந்தார். “கூட்டணி தர்மம் என்பது வேறு, ஆட்சியில் அதிகாரம் என்பது வேறு” என்பதைத் தெளிவாக விளக்கிய முதல்வர், தற்போதைய அரசியல் சூழலில் எதிரணியினரை வீழ்த்த கூட்டணியின் ஒற்றுமையே பிரதானம் என்பதை வலியுறுத்தியதாகக் கூறப்படுகிறது.
சுமார் முக்கால் மணி நேரம் நீடித்த இந்த ஆலோசனைக் கூட்டத்தில், கள எதார்த்தங்களையும், தற்போதைய அரசியல் சவால்களையும் முதல்வர் ஸ்டாலின் விவரித்ததைக் கேட்டு காங்கிரஸ் மேலிடம் சமாதானமடைந்துள்ளது. பெரிய இலக்கை அடையச் சிறு சலசலப்புகளைத் தவிர்க்க வேண்டும் என்ற அடிப்படையில், காங்கிரஸ் தனது பிடிவாதத்தைத் தளர்த்திக் கொண்டது. இதன் மூலம் கூட்டணியில் நிலவி வந்த முட்டுக்கட்டை நீங்கி, திமுக – காங்கிரஸ் உறவில் மீண்டும் ஒரு புத்துயிர் கிடைத்துள்ளதாக அரசியல் நோக்கர்கள் கருதுகின்றனர்.
இந்தத் திடீர் மாற்றத்தைத் தொடர்ந்து, வரும் தேர்தல்களில் திமுக கூட்டணியில் காங்கிரஸ் கட்சிக்கு கூடுதல் தொகுதிகள் ஒதுக்கப்படலாம் என எதிர்பார்க்கப்படுகிறது. அதிகாரப் பகிர்வு கோரிக்கையைக் கைவிட்டாலும், கௌரவமான எண்ணிக்கையில் தொகுதிகளைப் பெறுவதில் காங்கிரஸ் உறுதியாக உள்ளது. எது எப்படியோ, தேர்தல் நெருங்கும் வேளையில் கூட்டணியில் ஏற்பட்ட இந்த ‘மேஜிக்’ மாற்றம், அறிவாலய உடன்பிறப்புகள் மத்தியில் பெரும் உற்சாகத்தை ஏற்படுத்தியுள்ளதுடன், தொகுதிப் பங்கீடு பேச்சுவார்த்தைகளுக்கும் பச்சைக்கொடி காட்டியுள்ளது.