கோவிட்-ஐ விடப் பயங்கரமான பேராபத்து… மனிதகுலத்தையே அழிக்க வரும் அடுத்த பேரழிவு…. பில் கேட்ஸ் சொன்ன ஷாக் தகவல்….!

செயற்கை நுண்ணறிவு (AI) தொழில்நுட்பத்தின் அசுர வளர்ச்சி மனிதகுலத்திற்குப் பெரும் சவாலாக மாறும் என்று மைக்ரோசாஃப்ட் இணை நிறுவனர் பில் கேட்ஸ் எச்சரித்துள்ளார். ஃபைனான்சியல் டைம்ஸ் உச்சி மாநாட்டில் பேசிய அவர், ஓபன் சோர்ஸ் AI மாடல்களில் பாதுகாப்பு அம்சங்களை நீக்குவது மற்றும் உரிய கட்டுப்பாடுகள் இல்லாதது போன்ற காரணங்களால், ஆபத்தான நபர்கள் உயிரியல் ஆயுதங்களை உருவாக்கவோ அல்லது நாட்டின் முக்கியக் கட்டமைப்புகளை முடக்கவோ வாய்ப்புள்ளதாகத் தெரிவித்துள்ளார்.

மேலும், AI தொழில்நுட்பத்தைப் பயன்படுத்தி நடத்தப்படும் உயிரியல் தாக்குதல்கள் கோவிட்-19 பெருந்தொற்றை விடவும் மிக மோசமான விளைவுகளை ஏற்படுத்தும் என அவர் சுட்டிக்காட்டியுள்ளார். கோவிட் காலத்தில் உலகளவில் லட்சக்கணக்கானோர் உயிரிழந்த நிலையில், அதைவிடக் கொடூரமான நச்சு ஆபத்துகளை AI உருவாக்கக்கூடும் என்று எச்சரித்துள்ள அவர், இது குறித்து ஆந்த்ரோபிக் நிறுவனம் தனது ஐபிஓ அறிக்கையில் வெளிப்படையாகப் பேசியிருப்பதைப் பாராட்டியுள்ளார்.

AI துறையில் நிறுவனங்களே தங்களை ஒழுங்குபடுத்திக் கொள்ள வேண்டும் என்ற டொனால்ட் டிரம்பின் கொள்கைக்கு எதிர்ப்புத் தெரிவித்த பில் கேட்ஸ், பொதுவான பாதுகாப்புத் தரநிலைகளை உருவாக்க அரசாங்கத்தின் நேரடித் தலையீடு அவசியம் என்றார். சுயாதீன தணிக்கை முறைகள் மற்றும் உயிரியல் கண்காணிப்பை உலக நாடுகள் பலப்படுத்த வேண்டும் என்றும் அவர் கேட்டுக்கொண்டுள்ளார்.

அதேவேளையில், பாதுகாப்புக் காரணங்களுக்காக AI-யின் மருத்துவத் துறை சார்ந்த நன்மைகளைத் தடுத்துவிடக் கூடாது எனவும் அவர் குறிப்பிட்டார். புதிய மருந்துகளைக் கண்டறிவதிலும், மருத்துவப் பணிகளை விரைவுபடுத்துவதிலும் AI பெரிதும் உதவும் என்ற அவர், பொருளாதார மாற்றங்களை எதிர்கொள்ளக் கோடீஸ்வரர்கள் மீது கூடுதல் வரிகள் விதிக்கப்படுவதை ஆதரிப்பதாகத் தெரிவித்தார்.