சாப்பாட்டுக்கே வழியில்ல… எங்களை காப்பாத்துங்க… வேலை வாங்கித் தருவதாக ஏமாற்றி… தம்பதியை நடுத்தெருவில் நிறுத்திய ஏஜென்ட்… கதறிய வீடியோ இணையத்தில் வைரல்…!

மலேசியாவில் வேலை வாங்கித் தருவதாகக் கூறி மோசடி செய்த முகவரால், ராஜமகேந்திரவரத்தைச் சேர்ந்த வெங்கடரமணா மற்றும் பூஜிதா தம்பதியினர் பெரும் துயரத்திற்கு ஆளாகியுள்ளனர். பெடகண்டியாடா ராமச்சந்திரா டெஸ்டிங் இன்ஸ்டிடியூட் என்ற முகமை மூலம் ஆறு மாதங்களுக்கு முன்பு மலேசியா சென்ற இந்த தம்பதி, அங்குச் சென்ற பிறகு ஏமாற்றப்பட்டதை உணர்ந்தனர். போதிய வருமானமும் வேலையும் இல்லாததால், தங்களின் இரண்டு சிறு குழந்தைகளுடன் வயிற்றுப் பிழைப்பிற்கே வழியின்றி அவர்கள் அங்குத் தவித்து வருகின்றனர்.

வாழ்க்கையை நடத்த வழியின்றி அவதிப்படும் இத்தம்பதியினர், அங்குத் தாங்கள் எதிர்கொள்ளும் கொடூரமான சூழ்நிலையைக் விவரித்து இணையத்தில் உருக்கமான வீடியோ ஒன்றை வெளியிட்டுள்ளனர். அதில், தாங்கள் அடிப்படைத் தேவைகளுக்கே வழியின்றித் தவிப்பதாகவும், ஆந்திர அரசு உடனடியாகத் தலையிட்டு தங்களை மீண்டும் சொந்த ஊருக்கு மீட்டுச் செல்ல நடவடிக்கை எடுக்க வேண்டும் என்றும் கண்ணீர் மல்கக் கோரிக்கை விடுத்துள்ளனர்.

https://twitter.com/TV9Telugu/status/2097180007529582738/video/1

இந்த வீடியோ சமூக வலைதளங்களில் வெளியாகிப் பரவலான கவனத்தைப் பெற்றதைத் தொடர்ந்து, காவல்துறையினர் இச்சம்பவம் குறித்து உடனடி விசாரணை மேற்கொண்டனர். பாதிக்கப்பட்ட தம்பதியைத் தொடர்புகொண்டு அவர்களின் நிலைமையைக் கேட்டறிந்த காவல்துறையினர், அவர்களை ஏமாற்றி மலேசியாவிற்கு அனுப்பி வைத்த முகவரைப் பிடித்துத் தீவிர விசாரணை நடத்தி வருகின்றனர்.