தெலங்கானா மாநிலம் ஜகித்யாலா அருகே உள்ள பொரண்ட்லா கிராமத்தைச் சேர்ந்த சந்திரசேகர் – நவிதா தம்பதியரின் 9 வயது மகன் நிஷாந்த், கடந்த ஏப்ரல் 7-ம் தேதி மாரடைப்பால் திடீரென உயிரிழந்தான். சிவன் கோயில் ஒன்றில் நடந்த அன்னதான நிகழ்வில் தனது உறவினர்களுடன் மகிழ்ச்சியாக விளையாடிக் கொண்டிருந்த சிறுவன், திடீரென மயங்கி விழுந்தான். அவனது பெற்றோர் உடனடியாக மருத்துவமனைக்கு அழைத்துச் சென்ற போதிலும், சிறுவன் ஏற்கனவே மாரடைப்பால் உயிரிழந்துவிட்டதாக மருத்துவர்கள் அறிவித்தனர். விளையாடிக்கொண்டிருந்த சிறுவன் கண் இமைக்கும் நேரத்தில் உயிரிழந்தது அந்த கிராமத்தையே சோகத்தில் ஆழ்த்தியுள்ளது.
முன்பெல்லாம் 60 வயதைக் கடந்தவர்களுக்கு மட்டுமே ஏற்பட்ட மாரடைப்பு போன்ற இதய நோய்கள், இன்று சிறு குழந்தைகளையும் பாதிப்பது மருத்துவ உலகையே கவலையில் ஆழ்த்தியுள்ளது. சமீபகாலமாக வயது வித்தியாசம் இன்றி இளைஞர்களும் சிறுவர்களும் மாரடைப்புக்கு ஆளாவது அதிகரித்துள்ளது. நிஷாந்தின் மரணம் என்பது தனிப்பட்ட ஒரு குடும்பத்தின் இழப்பு மட்டுமல்லாமல், ஒட்டுமொத்த சமூகமும் குழந்தைகளின் ஆரோக்கியம் குறித்து சிந்திக்க வேண்டிய ஒரு எச்சரிக்கை மணியாக அமைந்துள்ளது. துறுதுறுவென ஓடி விளையாடும் பருவத்தில் இப்படி ஒரு பாதிப்பு ஏற்படுவது பெற்றோர்களிடையே பெரும் அதிர்வலைகளை ஏற்படுத்தியுள்ளது.
இந்த இளம் வயது மாரடைப்புகளுக்கு நவீன வாழ்க்கை முறை மாற்றங்களே முக்கிய காரணம் என்று மருத்துவர்கள் எச்சரிக்கின்றனர். குறிப்பாக சத்தான உணவுகளைத் தவிர்த்து துரித உணவுகளை (Fast Foods) அதிகமாக உட்கொள்ளுதல், போதிய உடல் உழைப்பு இல்லாமை மற்றும் முறையற்ற தூக்க பழக்கம் ஆகியவற்றால் சிறு வயதிலேயே உடலில் தேவையற்ற கொழுப்புகள் அதிகரிக்கின்றன. இது ரத்த நாளங்களில் பாதிப்பை ஏற்படுத்தி இதய செயலிழப்புக்கு வழிவகுக்கிறது. மேலும், சிறு வயதிலேயே ஏற்படும் மன அழுத்தம் மற்றும் நேரத்திற்கு உணவு உட்கொள்ளாத பழக்கமும் குழந்தைகளின் இதய ஆரோக்கியத்தை மறைமுகமாகச் சிதைக்கின்றன.
பெற்றோர்கள் தங்கள் குழந்தைகளின் உணவு மற்றும் உடல் செயல்பாடுகளில் மிகுந்த அக்கறை காட்ட வேண்டியது இன்றைய காலத்தின் கட்டாயமாகும். சத்தான காய்கறிகள், பழங்களை உணவில் சேர்ப்பதோடு, குழந்தைகள் போதிய நேரம் விளையாடுவதையும் ஓய்வெடுப்பதையும் உறுதி செய்ய வேண்டும். அதேபோல், ஏதேனும் அறிகுறிகள் தென்பட்டால் அலட்சியப்படுத்தாமல், ஆண்டுக்கு ஒருமுறை குழந்தைகளுக்கு முழு உடல் பரிசோதனை செய்வது இத்தகைய அகால மரணங்களைத் தவிர்க்க உதவும் என்று மருத்துவ வல்லுநர்கள் அறிவுறுத்துகின்றனர். விழிப்புணர்வு ஒன்றே நமது அடுத்த தலைமுறையை இத்தகைய பேராபத்துகளில் இருந்து காக்கும்.