சர்வதேச மகளிர் தினத்தை முன்னிட்டு, தமிழக அரசியல் களம் பெண்களை மையப்படுத்திய அறிவிப்புகளால் பரபரப்பாகியுள்ளது. மாமல்லபுரத்தில் இன்று நடைபெறவிருக்கும் தமிழக வெற்றிக் கழகத்தின் மகளிர் தின விழாவில், அக்கட்சியின் தலைவர் விஜய் பெண்களின் நலன் சார்ந்த முக்கிய அறிவிப்புகளை வெளியிடவுள்ளார். புதிய கட்சி என்பதால், பெண்களைக் கவரும் வகையில் என்னென்ன திட்டங்களை அவர் முன்வைக்கப்போகிறார் என்ற எதிர்பார்ப்பு அனைவரிடமும் எழுந்துள்ளது.
அதேபோல், நாளை மகளிர் தினத்தை முன்னிட்டு திமுக மற்றும் அதிமுக ஆகிய இரு பெரும் கட்சிகளும் பெண்களுக்காக பிரத்யேகமான நலத்திட்டங்களை அறிவிக்கத் திட்டமிட்டுள்ளன. இதில் குறிப்பாக, நகைக்கடன் தள்ளுபடி அல்லது பெண்களுக்கான புதிய பொருளாதாரத் திட்டங்கள் குறித்த அறிவிப்புகள் வெளியாகலாம் என அரசியல் வட்டாரங்களில் பேசப்படுகிறது. இந்த அறிவிப்புகள் பெண் வாக்காளர்களைக் கவரும் வகையில் அமையும் என்பதால், அரசியல் கட்சிகளின் அடுத்தடுத்த நகர்வுகள் தமிழகப் பெண்கள் மத்தியில் பெரும் எதிர்பார்ப்பை ஏற்படுத்தியுள்ளது.