6 முதல் 13 எம்.எல்.ஏ.க்கள் ராஜினாமா… மாமியார் மூலம் இலையை கருக வைத்த ’அர்ஜுனா’ வியூகம்.. அதிமுகவை உடைக்க நடந்த ரகசிய அசைன்மென்ட்…!

தமிழக அரசியலில் அடுத்தடுத்த பரபரப்பான திருப்பங்கள் அரங்கேறி வரும் நிலையில், அதிமுகவில் நிலவி வரும் உட்கட்சி குழப்பம் தற்போது புதிய விவாதங்களை கிளப்பியுள்ளது. சட்டசபையில் தன் நிலையை மேலும் பலப்படுத்திக் கொள்ளும் நோக்கில், ஆளும் தமிழக வெற்றிக் கழகத்தின் (தவெக) தலைவர் விஜய், அதிமுகவின் பலவீனமான பகுதிகளை குறிவைத்து காய்களை நகர்த்தி வருவதாக அரசியல் வட்டாரங்கள் தெரிவிக்கின்றன. குறிப்பாக, லாட்டரி அதிபர் மார்டினின் மனைவி லீமா ரோஸ் மற்றும் தவெகவின் ஆதவ் அர்ஜுனா ஆகியோர் மூலமாக அதிமுக அதிருப்தி எம்.எல்.ஏ.க்களை தவெக பக்கம் இழுக்கும் ரகசிய அசைன்மென்ட் தீவிரமாக நடத்தப்பட்டதாகக் கூறப்படுகிறது.

ஆரம்பத்தில் தவெக தரப்பில் பேசப்பட்டபடி அமைச்சரவை வாய்ப்போ அல்லது முக்கிய பொறுப்புகளோ கிடைக்காததால், அதிருப்தி அணியினர் மீண்டும் அதிமுக தலைமையுடன் சமரசம் பேச முயன்றனர். தம்மீதான ஒழுங்கு நடவடிக்கைகளை திரும்பப் பெற வேண்டும் என்ற கோரிக்கையோடு எடப்பாடி பழனிசாமியிடம் அவர்கள் தூது அனுப்பினர். ஆனால், இபிஎஸ் தரப்போ மன்னிப்புக் கடிதம், தலைமைக்குக் கட்டுப்படுதல் மற்றும் பழைய மாவட்டச் செயலாளர் பொறுப்புகள் மீண்டும் வழங்கப்படாது போன்ற கடுமையான நிபந்தனைகளை விதித்தது. இந்த நிபந்தனைகளால் அதிருப்தி அடைந்த சி.வி.சண்முகம் உள்ளிட்ட முக்கிய தலைவர்கள், மாவட்ட அரசியலில் தங்களின் செல்வாக்கு சரிந்துவிடும் என்ற அச்சத்தில் இதற்கு கடும் எதிர்ப்பு தெரிவித்து தனி ஆலோசனைகளில் ஈடுபட்டு வருகின்றனர்.

இதேவேளையில், அதிமுகவில் புதிய மாவட்டச் செயலாளர்களாகப் பொறுப்பேற்றவர்கள், ஏற்கனவே நீக்கப்பட்டவர்களுக்கு மீண்டும் பொறுப்பு வழங்கினால் தாங்கள் மொத்தமாக ராஜினாமா செய்ய நேரிடும் என தலைமைக்கு எச்சரிக்கை விடுத்துள்ளனர். இந்த இக்கட்டான சூழ்நிலையைப் பயன்படுத்திக் கொண்ட ஆளும் தவெக தரப்பு, அதிருப்தி எம்.எல்.ஏ.க்கள் தங்கள் பதவியை ராஜினாமா செய்துவிட்டு தவெகவில் இணைந்தால், மீண்டும் அதே தொகுதியில் போட்டியிட வாய்ப்பு வழங்கப்படும் என்ற அதிரடி ஆஃபரை முன்வைத்துள்ளது. இதன் தொடர்ச்சியாக, மேலும் 6 முதல் 13 எம்.எல்.ஏ.க்களை ராஜினாமா செய்ய வைத்து, இடைத்தேர்தல் மூலம் ஆட்சிக்கான தனிப்பெரும்பான்மையை முழுமையாக உறுதி செய்ய ஆளும் தரப்பு கணக்கு போட்டு வருவதாகத் தெரிகிறது.

இருப்பினும், இந்த விவகாரத்தை கௌரவப் பிரச்சனையாகப் பார்க்காமல் கட்சி உடைவதைத் தவிர்க்க எடப்பாடி பழனிசாமி தரப்பு அதிரடி முடிவை எடுத்துள்ளது. அதிருப்தி எம்.எல்.ஏ.க்கள் மீண்டும் ஒன்றிணையும் சூழல் உருவானதை அடுத்து, கட்சித்தாவல் தடைச்சட்டத்தின் கீழ் சபாநாயகரிடம் கொடுக்கப்பட்டிருந்த புகாரை இபிஎஸ் தரப்பு தற்போது வாபஸ் பெற்று சமரசப் பேச்சுவார்த்தையைத் தொடங்கியுள்ளது. இதுகுறித்து மூத்த நிர்வாகிகள் கூறுகையில், “எம்.ஜி.ஆர், ஜெயலலிதா காலத்திலும் இதுபோன்ற சோதனைகள் வந்துள்ளன; தேர்தல் பின்னடைவு காலங்களில் இத்தகைய குழப்பங்கள் இயல்பானதே என்பதால் அதிமுக பலவீனமடைந்து விடாது” என நம்பிக்கை தெரிவிக்கின்றனர். இந்த அதிரடி அரசியல் சதுரங்க வேட்டையில் இறுதி வெற்றி யாருக்கு என்பது வரும் நாட்களில் தெளிவாகத் தெரியும்.