அவ்வளவுதான் மொத்தமா போச்சு… சீட்டுக் கட்டாய் சரியும் எடப்பாடி கோட்டை… மீட்டிங்கில் மிஸ்ஸான 65 மாஜிகள்… செம ஷாக்கில் இபிஎஸ்…!

தமிழக சட்டமன்றத் தேர்தலில் அதிமுக எதிர்பார்த்த வெற்றியைப் பெற முடியாமல் மூன்றாவது இடத்துக்குத் தள்ளப்பட்டதைத் தொடர்ந்து, கட்சிக்குள் ஏற்பட்டுள்ள அதிகாரப் போட்டி தற்போது உச்சகட்டத்தை எட்டியுள்ளது. குறிப்பாக, எடப்பாடி பழனிசாமி தலைமையிலான அணிக்கும், சி.வி. சண்முகம் – எஸ்.பி. வேலுமணி தலைமையிலான அணிக்கும் இடையிலான மோதல் வெளிப்படையான அரசியல் சண்டையாக மாறியுள்ளது. இந்தச் சூழலில், சென்னையில் உள்ள அதிமுக தலைமை அலுவலகத்தில் எடப்பாடி பழனிசாமி தலைமையில் இன்று அவசர மாவட்டச் செயலாளர்கள் கூட்டம் நடைபெற்றது. கூட்டத்திற்கு முன்னதாக அவர் எம்.ஜி.ஆர் மற்றும் ஜெயலலிதா சிலைகளுக்கு மாலை அணிவித்து மரியாதை செலுத்தினாலும், உட்கட்சிப் பூசல் காரணமாக கட்சியின் முக்கியப் புள்ளிகள் பலர் இதில் பங்கேற்காதது பெரும் அதிர்ச்சியை ஏற்படுத்தியுள்ளது.

கட்சியின் தற்போதைய நிலை மற்றும் சட்டப்பேரவை வியூகங்கள் குறித்து விவாதிக்கக் கூட்டப்பட்ட இந்த ஆலோசனையில், மொத்தமுள்ள 82 மாவட்டச் செயலாளர்களில் வெறும் 17 பேர் மட்டுமே கலந்து கொண்டுள்ளனர். அதிலும் கொடுமை என்னவென்றால், பங்கேற்ற பெரும்பாலான மாவட்டச் செயலாளர்கள் கடந்த 3 நாட்களுக்குள் எடப்பாடி பழனிசாமியால் புதிதாக நியமிக்கப்பட்டவர்கள் ஆவர். செல்லூர் ராஜூ, ராஜேந்திர பாலாஜி மற்றும் ராஜன் செல்லப்பா போன்ற மூத்த தலைவர்கள் இக்கூட்டத்தைப் புறக்கணித்துள்ள நிலையில், முன்னாள் அமைச்சர் ஜெயக்குமார் எவ்வித கூட்டங்களிலும் பங்கேற்காமல், யாருக்கும் ஆதரவு தெரிவிக்காமல் மௌனம் காத்து வருவது அரசியல் வட்டாரத்தில் பரபரப்பை மேலும் அதிகரித்துள்ளது.

மறுபுறம், தமிழகத்தில் புதியதாகப் பொறுப்பேற்றுள்ள தமிழக வெற்றிக் கழக (தவெக) அரசுக்கு சி.வி. சண்முகம் மற்றும் எஸ்.பி. வேலுமணி தரப்பினர் ஆதரவு தெரிவித்திருப்பது அதிமுக அரசியலில் ஒரு புதிய திருப்பத்தை ஏற்படுத்தியுள்ளது. சட்டப்பேரவையில் தவெக அரசுக்கு ஆதரவாகச் சில அதிமுக எம்.எல்.ஏ.க்கள் வாக்களித்த சம்பவத்தால் எடப்பாடி பழனிசாமி கடும் அதிருப்தியில் உள்ளார். இதன் காரணமாக, கட்சித் தாவல் தடைச் சட்டத்தின் கீழ் சம்பந்தப்பட்ட எம்.எல்.ஏ.க்கள் மீது நடவடிக்கை எடுக்கக் கோரி அவர் சபாநாயகரிடம் மனு அளித்துள்ளார். மேலும், தவெக அரசு அமைந்த பிறகு அதிமுகவின் முக்கியத் தலைவர்கள் சிலர் அங்கு செல்லக்கூடும் என்ற பேச்சும் பரவலாக நிலவி வருகிறது.

ஒரு காலத்தில் தமிழக அரசியலில் பிரதான ஆளுமையாகத் திகழ்ந்த அதிமுக, தற்போது உட்கட்சி மோதலாலும் பிளவுகளாலும் சிக்குண்டு தவித்து வருவது அக்கட்சியின் அடிமட்டத் தொண்டர்களைக் கடும் அதிர்ச்சியிலும் கவலையிலும் ஆழ்த்தியுள்ளது. பல மாவட்டங்களில் உள்ள நிர்வாகிகள் யாரை ஆதரிப்பது என்று தெரியாமல் குழப்பத்தில் ஆழ்ந்துள்ளனர். எடப்பாடி பழனிசாமி தனது பலத்தை நிரூபிக்கத் தீவிர முயற்சிகளை மேற்கொண்டு வரும் நிலையில், இந்த உட்கட்சிப் போர் அதிமுகவின் எதிர்காலத்தை எந்தப் பாதைக்குக் கொண்டு செல்லப் போகிறது என்ற கேள்வி எழுந்துள்ளது.