ஓபிஎஸ், டிடிவி-யை கழட்டிவிட்ட பாஜக?… 10 நிமிட சந்திப்பில் மோடியிடம் இபிஎஸ் கொடுத்த ரிப்போர்ட்…!

தமிழகத்தில் 2026 ஆம் ஆண்டு சட்டமன்றத் தேர்தல் நெருங்கிக் கொண்டிருக்கும் நிலையில் அதிமுக மீண்டும் பாஜக உடன் கூட்டணி அமைத்துள்ளது. கூட்டணி அமைத்த பிறகு முதல் முறையாக திருச்சி ஏர்போட்டில் வைத்து பிரதமர் மோடியை இபிஎஸ் நேரில் சந்தித்தார். அப்போது இபிஎஸ் கோரிக்கை மனு ஒன்றையும் கொடுத்துள்ளார். அதில், விவசாய கடன் வழங்குவதில் சிபில் ஸ்கோர் கேட்பதில் இருந்து வங்கிகள் விதிவிலக்கு வழங்க வேண்டும், கோதாவரி மற்றும் காவிரி இணைப்பு திட்டத்திற்கு நிதி, தமிழகத்தில் ராணுவ வழிதடத்தை அமைக்க வேண்டும் உள்ளிட்ட கோரிக்கைகளை வலியுறுத்தியுள்ளார்.

10 நிமிடம் இபிஎஸ் மோடியை சந்தித்து பேசிய நிலையில் தமிழக அரசியல் நிலவரம் குறித்து மோடியிடம் விரிவாக எடுத்துரைத்ததாக தெரிகிறது. கடந்த காலங்களில் தனக்கு எதிராக ஓபிஎஸ் மற்றும் டிடிவி தினகரன் ஆகியோர் செய்த சூழ்ச்சிகளை அவர் எடுத்துச் சொல்லியதாக கூறப்படுகிறது. இபிஎஸ் கூறியதை கேட்டு பிரதமர் மோடி தேர்தல் களம் குறித்த ரிப்போர்ட்டையும் கேட்டு அறிந்துள்ளார். அதே சமயம் பாஜக மற்றும் அதிமுக கூட்டணி வலுவாக இருப்பதையும் கூறியுள்ளார். குறிப்பாக அந்த கூட்டணியில் இருக்கும் ஏசி சண்முகம் மற்றும் வாசன் உள்ளிட்டோர் மோடியை சந்தித்தனர். அதே சமயம் நேரம் கேட்டு அனுமதி கொடுக்காததால் ஓபிஎஸ் சந்திக்கவில்லை, தினகரனும் இந்த நிகழ்ச்சியில் பங்கேற்கவில்லை. இதன் மூலம் இபிஎஸ் சொன்னது போல, ஓபிஎஸ் மற்றும் டிடிவி தினகரன் அதிமுக கூட்டணியில் தற்போதைக்கு இல்லை என்பது உறுதியாகிவிட்டது.