அரசியல் வட்டாரத்தில் பெரும் பரபரப்பை ஏற்படுத்தியுள்ள இந்தச் சந்திப்பு, அ.தி.மு.க தொண்டர்களிடையே கடும் அதிர்ச்சியையும் பல்வேறு கேள்விகளையும் எழுப்பியுள்ளது. ஏற்கனவே கட்சியின் பொதுச்செயலாளர் எடப்பாடி பழனிசாமியின் தடையை மீறி, ஓ. பன்னீர்செல்வம் மற்றும் டி.டி.வி. தினகரன் ஆகியோரைச் சந்தித்த மூத்த தலைவர் கே.ஏ. செங்கோட்டையன் உள்ளிட்ட நிர்வாகிகள் மீது அதிரடி ஒழுங்கு நடவடிக்கை பாய்ந்தது. இத்தகையச் சூழலில், கட்சியை விட்டு நீக்கப்பட்ட ஒருவரை அ.தி.மு.கவின் மகளிர் அணி இணைச் செயலாளரான லீமா ரோஸ் நேரில் சந்தித்துப் பேசியிருப்பது, உட்கட்சி ஒழுங்குமுறையின் தற்போதைய நிலையை கேள்விக்குறியாக்கியுள்ளது. இந்தச் சந்திப்பு எடப்பாடி பழனிசாமியின் தலைமைக்கு விடுக்கப்பட்ட சவாலாகவே பார்க்கப்படுகிறது.
இதன் காரணமாக, சமூக ஊடகங்களில் அ.தி.மு.க தொண்டர்கள் எடப்பாடி பழனிசாமியின் தலைமைப் பண்பு குறித்து காரசாரமான விவாதங்களை முன்வைத்து வருகின்றனர். கட்சியின் விதிகளுக்குப் புறம்பாகச் செயல்பட்ட லீமா ரோஸை உடனடியாகக் கட்சியை விட்டு நீக்கக்கூடிய துணிச்சலும் தைரியமும் எடப்பாடி பழனிசாமிக்கு இல்லையா என்ற அடுக்கடுக்கான கேள்விகள் தொண்டர்களாலேயே எழுப்பப்பட்டு வருகின்றன. இந்த விவகாரம் கட்சியின் உள்ளே புகைச்சலை ஏற்படுத்தியுள்ள நிலையில், தலைமை இதற்கு என்ன மாதிரியான விளக்கத்தையோ அல்லது ஒழுங்கு நடவடிக்கையையோ எடுக்கப்போகிறது என்பதைப் பொறுத்திருந்துதான் பார்க்க வேண்டும்.