அதிர்ந்த அரசியல் களம்…. “திமுக ஐடி விங் செய்த சதி”… ஆதாரத்துடன் வெளுத்து வாங்கிய ஆதவ் அர்ஜுனா…!

விடுதலைச் சிறுத்தைகள் கட்சியில் வெறும் 20 பேர் மட்டுமே இருப்பதாகக் கூறி தான் விமர்சித்ததாக வெளியான செய்திகளுக்கு தமிழக வெற்றிக் கழகத்தின் முக்கிய நிர்வாகியான ஆதவ் அர்ஜுனா திட்டவட்டமாக மறுப்பு தெரிவித்துள்ளார். மாமல்லபுரத்தில் நடைபெற்ற தவெக செயல் வீரர்கள் கூட்டத்தில் தனது பேச்சு தவறாகப் புரிந்துகொள்ளப்பட்டதாகவும், அரசியல் ஆதாயத்திற்காகத் திமுக தரப்பினர் திட்டமிட்டு இதனைத் திரித்து விட்டதாகவும் அவர் குற்றம் சாட்டியுள்ளார்.

இது குறித்து தனது சமூக வலைதளப் பக்கத்தில் விளக்கமளித்துள்ள ஆதவ் அர்ஜுனா, விடுதலைச் சிறுத்தைகள் கட்சி என்பது ஒடுக்கப்பட்ட மக்களுக்கான பேரியக்கம் என்றும், அதன் தலைவர் திருமாவளவன் மீது தான் கல்லூரி காலம் முதலே மிகுந்த மதிப்பும் மரியாதையும் கொண்டிருப்பதாகக் குறிப்பிட்டுள்ளார். ‘ஆட்சியிலும் பங்கு, அதிகாரத்திலும் பங்கு’ என்ற மக்களின் முழக்கத்தை முன்னெடுப்பதில் திருமாவுடன் தனது நிலைப்பாடும் ஒன்றாகவே இருப்பதாக அவர் நெகிழ்ச்சியுடன் தெரிவித்துள்ளார்.

தனது பேச்சின் பின்னணியைத் தெளிவுபடுத்திய அவர், விசிகவில் ஒட்டுமொத்தமாக 20 பேர் இருப்பதாகத் தான் கூறவில்லை என்றும், மாறாக விசிகவிற்குள் இருந்துகொண்டு திமுகவின் அடியாள்களாகவும், உளவு பார்ப்பவர்களாகவும் செயல்படும் ஒரு குறிப்பிட்ட 20 நபர்களைப் பற்றி மட்டுமே தான் பேசியதாகவும் விளக்கினார். அந்த நபர்கள் திமுகவின் நலனுக்காக விசிகவின் வளர்ச்சியைத் தடுத்து வருவதாகவும், அவர்களின் உண்மை முகத்தைத் தோலுரிப்பதே தனது நோக்கம் என்றும் அவர் கூறியுள்ளார்.

இறுதியாக, திமுகவின் தகவல் தொழில்நுட்ப அணியினர் தனது பேச்சின் ஒரு பகுதியை மட்டும் வெட்டி எடுத்து பொய் செய்திகளைப் பரப்புவதாக ஆதவ் அர்ஜுனா சாடியுள்ளார். ஒடுக்கப்பட்ட மக்களின் குரலை ஒடுக்க நினைக்கும் இத்தகைய அரசியலுக்கு விசிக தொண்டர்கள் பலியாக வேண்டாம் என்றும், அதிகாரப் பங்கீடு கிடைக்கும் வரை தனது குரல் ஓங்கி ஒலிக்கும் என்றும் அவர் அந்தப் பதிவில் உறுதிப்படத் தெரிவித்துள்ளார்.