ஆபாசமாக திரைப்படங்களில் நடித்ததாகவும், சமூக ஊடகங்கள் மற்றும் மொபைல் செயலி மூலமாக அவற்றை பரப்பியதாகவும் குற்றச்சாட்டை எழுந்ததை தொடர்ந்து கேரள நடிகை ஸ்வேதா மேனன் மீது போலீசார் வழக்கு பதிவு செய்துள்ளனர். நிதி ஆதாயத்திற்காக ஆபாச திரைப்படங்களில் நடித்ததாக அவர் மீது போலீசார் வழக்குப்பதிவு செய்துள்ளனர். மார்ட்டின் என்ற சமூக ஆர்வலர் அளித்த புகாரைத் தொடர்ந்து நீதிமன்ற உத்தரவின் பேரில் போலீசார் இந்த நடவடிக்கையை மேற்கொண்டுள்ளனர். அவர் மீது ஆபாச தடை சட்டம் மற்றும் ஐடி சட்டத்தின் கீழ் வழக்குப்பதிவு செய்யப்பட்டுள்ளது. இவர் ரதி நிர்வேதம், பலேரி மாணிக்யம், ஒரு நள்ளிரவு கொலை மர்மம் மற்றும் காளி மண்ணு படங்களில் நடித்த கதாபாத்திரங்கள் மூலம் சர்ச்சைக்கு பெயர் போனவர்.
இதனைத் தவிர ஆணுறை விளம்பரத்திலும் அவர் இருப்பது குறித்து கடுமையான கேள்விகள் எழுப்பப்பட்டது. இந்த பதிவுகள் இளைஞர்களை மோசமாக பாதிக்கின்றன என்றும் சமூகத்தில் தவறான செய்திகளை பரப்புவதாகவும் புகாரில் தெரிவிக்கப்பட்டுள்ளது. நடிகை ஸ்வேதா மேனன் மலையாள திரைப்படங்களில் முன்னணி நடிகையாகவும், தமிழ் மற்றும் இந்தி திரைப்படங்களிலும் நடித்துள்ளார். இவர் கடந்த 2011 ஆம் ஆண்டு சிறந்த நடிகைக்கான கேரள மாநில விருது உள்ளிட்ட பல விருதுகளை பெற்றுள்ளார். தமிழில் 2000 ஆம் ஆண்டு சினேகிதியே படத்தில் நடித்த இவர் நடிகர் கார்த்திக்கின் சந்தித்த வேலை, நான் அவன் இல்லை 2, அரவான் போன்ற தமிழ் திரைப்படங்களில் நடித்துள்ளது குறிப்பிடத்தக்கது.