சில்க் ஸ்மிதா மீது கல் எறிந்த செல்வமணி… “பளார்” விட்ட ரோஜா… ஒரே அடியில் சுருண்டு விழுந்த நடிகை…. நினைவுகளை பகிர்ந்த இயக்குனர்….!!

இயக்குநர் மணிவண்ணனிடம் உதவி இயக்குநராகப் பயிற்சி பெற்ற ஆர்.கே. செல்வமணி, 1990 ஆம் ஆண்டு விஜயகாந்த் நடித்த ‘புலன் விசாரணை’ திரைப்படத்தின் மூலம் இயக்குநராக அறிமுகமானார். அந்தப் படத்தின் பெரிய வெற்றியைத் தொடர்ந்து, விஜயகாந்தின் 100-வது படமான ‘கேப்டன் பிரபாகரனை’ இயக்கினார், இது அதைவிட மாபெரும் வெற்றியை ஈட்டியது. விஜயகாந்துக்கு இரண்டு அதிரடி வெற்றிப் படங்களைக் கொடுத்த பின்னர், செல்வமணி அடுத்ததாக பிரசாந்த் நடித்த ‘செம்பருத்தி’ படத்தை இயக்கினார்.

இந்தப் படத்தின் மூலம் நடிகை ரோஜா திரையுலகிற்கு அறிமுகமானார்.  இருவருக்கும் இடையே காதல் மலர, 2002 ஆம் ஆண்டு இருவரும் திருமணம் செய்து கொண்டனர். திருமணத்திற்கு முன்னர், 1994 ஆம் ஆண்டு ‘அதிரடிப்படை’ படப்பிடிப்பின் போது நடந்த ஒரு சுவாரஸ்யமான அனுபவத்தை ஆர்.கே. செல்வமணி பகிர்ந்துள்ளார். நடிகர் விஜயகாந்த் படப்பிடிப்பின்போது பலரையும் வேடிக்கைக்காகக் குட்டி கற்களால் எறிவது வழக்கம். அந்தப் பழக்கம் இவருக்கும் வந்துள்ளது.

ஒருநாள், செல்வமணி கேமரா மேன் எம்.வி. பன்னீர்செல்வம் மீது கல் எறிய முயன்றபோது, அது எதிர்பாராமல் நடிகை சில்க் ஸ்மிதா மீது பட்டுவிட்டது. இதனால் என்ன நடக்குமோ என்று இயக்குநர் பயந்த நிலையில், சில்க் ஸ்மிதா எந்தக் கோபமும் காட்டாமல், அவரைப் பார்த்துச் சிரித்துள்ளார்.

இதனைப் பார்த்துக் கொண்டிருந்த ரோஜா, “நீங்கள் கல் எறிந்தது ஒருபுறமிருக்க, அவர் ஏன் உங்களைப் பார்த்துச் சிரிக்கிறார்?” என்று கேட்டு கோபமடைந்துள்ளார். அதன் பிறகு, கதையின் தேவைக்காக சிறையில் நடக்கும் ஒரு காட்சியில், சீனியர் கைதியான சில்க் ஸ்மிதாவுக்கு ரோஜா சிகரெட் கொடுப்பது போலவும், ரோஜா அவரை அறைவது போலவும் ஒரு காட்சி படமாக்கப்பட்டது.

இந்தக் காட்சியில், கோபத்திலிருந்த ரோஜா, சில்க் ஸ்மிதாவை உண்மையாகவே ஓங்கி அறைந்ததாகவும், அதன் வேகத்தில் சில்க் ஸ்மிதா சுருண்டு விழுந்ததாகவும் ஆர்.கே. செல்வமணி அந்தப் பேட்டியில் தெரிவித்துள்ளார்.