காலில் விழுந்து அழுத பெற்றோர்… “என்ன ஆனாலும் வழக்கை வாபஸ் பெற மாட்டேன்”…. கொஞ்சமும் இரக்கப்படாத நடிகை ரம்யா.. பெங்களூரில் பரபரப்பு….!

கர்நாடகத் திரைத்துறையின் பிரபல நடிகையும், காங்கிரஸ் கட்சியின் முன்னாள் நாடாளுமன்ற உறுப்பினருமான ரம்யா, ரேணுகாசாமி கொலை வழக்கில் கைது செய்யப்பட்ட நடிகர் தர்ஷனுக்கு எதிராகக் குரல் கொடுத்திருந்தார். மேலும், இவ்வழக்கில் காவல்துறையின் அதிரடி நடவடிக்கைகளைப் பாராட்டித் தனது சமூக வலைதளப் பக்கங்களில் பதிவிட்டிருந்தார். இதனால் ஆத்திரமடைந்த தர்ஷனின் ரசிகர்கள், நடிகை ரம்யாவை இலக்கு வைத்துச் சமூக வலைதளங்களில் மிக மோசமான அவதூறுகளையும், ஆபாசக் கருத்துக்களையும் பதிவிட்டு வந்தனர். இந்தத் தொடர் தாக்குதலால் பெரும் மன உளைச்சலுக்கு ஆளான ரம்யா, உடனடியாகக் காவல்துறையில் புகார் அளித்தார். புகாரின் பேரில் வழக்குப் பதிவு செய்த போலீசார், அவதூறு பரப்பிய 21 பேரைக் கைது செய்து பெங்களூரு சிட்டி சிவில் நீதிமன்றத்தில் வழக்குத் தொடர்ந்தனர்.

இந்நிலையில், கைது செய்யப்பட்ட 21 பேரின் குடும்பத்தினரும் பெங்களூருவில் நடிகை ரம்யாவை நேரில் சந்தித்து மன்னிப்பு கோர முயன்றனர். ஆனால், அவர்களைச் சந்திக்க ரம்யா மறுத்துவிட்டார். இதனைத் தொடர்ந்து செய்தியாளர்களைச் சந்தித்த அக்குடும்பத்தினர், தங்கள் பிள்ளைகள் தெரியாமல் தவறு செய்துவிட்டதாகவும், இனிமேல் இதுபோன்ற சம்பவங்கள் நிகழாது என்றும் உறுதியளித்தனர். மேலும், தங்களின் சூழ்நிலையைக் கருத்தில் கொண்டு, இந்த ஒரு முறை மட்டும் மன்னித்து வழக்கைத் திரும்பப் பெறுமாறு ரம்யாவிடம் உருக்கமாகக் கோரிக்கை விடுத்தனர்.

எனினும், அவர்களின் கோரிக்கையைத் தீர்க்கமாக நிராகரித்த நடிகை ரம்யா, செய்தியாளர்களிடம் பேசுகையில் தனது நிலையைத் தெளிவாகக் குறிப்பிட்டார். “கையில் செல்போன் இருக்கிறது என்பதற்காகச் சமூக வலைதளங்களில் பெண்களைப் பற்றிப் ஆபாசமாகவும், அவதூறாகவும் பேசுவது முற்றிலும் தவறானது. ஒரு பெண்ணைப் பற்றி தவறாக விமர்சிக்கும் முன் ஆயிரம் முறை யோசிக்க வேண்டும்; இந்த வழக்கு பெண்களுக்கு எதிராகச் செயல்படும் ஒவ்வொருவருக்கும் தகுந்த பாடமாக அமைய வேண்டும் என்பதால், எந்தக் காரணம் கொண்டும் வழக்கை வாபஸ் பெற மாட்டேன்” என்று அவர் உறுதியாகத் தெரிவித்துள்ளார்.