ஒரு காலத்தில் தங்களுக்குப் பிடித்த நடிகர், நடிகைகளின் புகைப்படங்களைப் பார்க்கவும், அவர்களுடன் கலந்துரையாடவும் சமூக வலைதளங்கள் ரசிகர்களுக்கு ஒரு இலவசத் தளமாக அமைந்திருந்தன. லைவ் வீடியோக்கள், கேள்வி-பதில் நிகழ்ச்சிகள் என ரசிகர்களுடன் நெருங்கிய தொடர்பில் இருந்த பிரபலங்கள், தற்போது அதையே ஒரு மாதாந்திர வருமான ஈட்டும் வழியாக மாற்றத் தொடங்கியுள்ளனர். இன்ஸ்டாகிராம் அறிமுகப்படுத்தியுள்ள வசதியைப் பயன்படுத்தி, “பிரத்யேகப் பதிவுகள்” என்ற பெயரில் ரசிகர்களிடமிருந்து மாதந்தோறும் கட்டணம் வசூலிக்கும் நடைமுறை கோலிவுட் மற்றும் சின்னத்திரை வட்டாரத்தில் நாளுக்கு நாள் தீவிரமடைந்து வருகிறது.
அந்த வரிசையில், தற்போது பிரபல சீரியல் நடிகை ஹரிப்பிரியாவும் இணைந்துள்ளார். மாதம் 45 ரூபாய் கட்டணம், முதல் 14 நாட்கள் இலவச ட்ரையல் என அறிவித்துள்ள அவர், பணம் செலுத்தும் ரசிகர்களுக்கு மட்டும் பிரத்யேக வீடியோக்களும், நேரடியாகப் பேசும் வாய்ப்பும் வழங்கப்படும் எனத் தெரிவித்துள்ளார். இவருக்கு முன்பாகவே நந்திதா ஸ்வேதா, தர்ஷா குப்தா, பிக் பாஸ் அபிராமி, ஜனனி அசோக்குமார் உள்ளிட்ட பல சினிமா மற்றும் சீரியல் நடிகைகள் இந்த கட்டண முறையைப் பின்பற்றி வருகின்றனர். குறிப்பாக, சினிமாவில் பட வாய்ப்புகள் குறையும் போது, நடிகைகள் தங்களின் வருமானத்தைப் பெருக்கிக் கொள்ள இந்த சமூக வலைதள உத்தியைக் கையில் எடுக்கிறார்கள் என்ற பேச்சும் பரவலாக எழுந்துள்ளது.
இந்த புதிய கலாச்சாரம் சமூக வலைதளங்களில் தட்டையான விவாதங்களை எழுப்பியுள்ளதுடன், ரசிகர்களிடையே பெரும் அதிருப்தியையும் ஏற்படுத்தியுள்ளது. “ரசிகர்களின் பேராதரவால்தான் இந்த நடிகைகள் இன்று புகழின் உச்சத்தில் இருக்கிறார்கள்; ஆனால், இன்று அதே ரசிகர்களைப் பணம் செலுத்தும் வாடிக்கையாளர்களாக மாற்றுவது எந்த விதத்தில் நியாயம்?” என்று பலரும் கேள்வி எழுப்பி வருகின்றனர். மேலும், இன்று 45 ரூபாயில் தொடங்கும் இந்த கட்டணம், நாளை 500 ரூபாய் என உயரும் என்றும், இன்ஸ்டாகிராம் தளம் தற்போது ஒரு ஓடிடி தளம் போல மாறிவருவதாகவும் நெட்டிசன்கள் விமர்சித்து வருகின்றனர்.
மறுபுறம், இந்த சப்ஸ்கிரிப்ஷன் முறைக்கு ஆதரவாகவும் சில கருத்துகள் முன்வைக்கப்படுகின்றன. “இது ஒன்றும் கட்டாயச் சட்டம் அல்ல, விருப்பம் உள்ளவர்கள் மட்டுமே பணம் செலுத்திப் பார்க்கப் போகிறார்கள்; யாரும் யாரையும் வற்புறுத்தவில்லை” என்று நடிகைகளின் ஆதரவாளர்கள் வாதிடுகின்றனர். இருப்பினும், தங்களுக்குப் பிடித்த பிரபலங்களின் பிரத்யேகப் புகைப்படங்களைப் பார்க்கும் ஆர்வத்தில், பள்ளி மற்றும் கல்லூரி மாணவர்கள் தங்களின் பணத்தை வீணடிப்பதோடு, பிரபலங்களுக்கும் ரசிகர்களுக்கும் இடையே உள்ள ‘அன்பு’ சார்ந்த உறவு, தற்போது முழுக்க முழுக்க ‘பணம்’ சார்ந்த உறவாக மாறி வருவது வேதனைக்குரிய விஷயம் என்று சமூக ஆர்வலர்கள் கவலை தெரிவிக்கின்றனர்.