“குழந்தை பிறந்தாச்சு, பேர் வச்சாச்சு”… நடிகர் விஜய்க்கு பவர் ஸ்டார் கொடுத்த ஓப்பன் சேலஞ்ச்… ஆரம்பத்திலேயே தடாலடி சவால்….!

தமிழகத்தில் 2026 சட்டமன்றத் தேர்தல் களம் தற்போதே சூடுபிடிக்கத் தொடங்கியுள்ளது. தி.மு.க மற்றும் அ.தி.மு.க ஆகிய பிரதான கூட்டணிகள் ஒருபுறம் வியூகங்களை வகுக்க, மறுபுறம் நடிகர் விஜய்யின் தமிழக வெற்றிக் கழகம் (TVK) மற்றும் நாம் தமிழர் கட்சி போன்ற கட்சிகள் களத்தில் தீவிரம் காட்டி வருகின்றன. இந்தச் சூழலில், நகைச்சுவை நடிகர் பவர் ஸ்டார் சீனிவாசன் ‘AVK’ (அண்ணா வளர்ச்சி கழகம்) என்ற புதிய கட்சியைத் தொடங்கப்போவதாக அறிவித்துள்ளது அரசியல் வட்டாரத்தில் சலசலப்பை ஏற்படுத்தியுள்ளது.

நடிகர் விஜய் அரசியலில் தனக்குத்தான் போட்டி என்று சவால் விடுத்துள்ள பவர் ஸ்டார், “அவர் TVK என்றால் நான் AVK” என அதிரடியாகப் பேசியுள்ளார். திரைத்துறையில் அண்ணன் தம்பிகளாக இருந்தாலும், அரசியலில் விஜய்யை எதிர்கொள்ளத் தயார் என்றும் அவர் தெரிவித்துள்ளார். கட்சிப் பெயரை அறிவித்த கையோடு, விரைவில் இதற்கான பதிவுப் பணிகளை தேர்தல் ஆணையத்தில் மேற்கொள்ள இருப்பதாகவும், தேர்தல் வியூகங்களை வகுக்க உள்ளதாகவும் அவர் கூறியுள்ளார்.

கடந்த காலங்களில் பா.ஜ.க, த.மா.கா உள்ளிட்ட பல்வேறு கட்சிகளில் இயங்கிய பவர் ஸ்டார் சீனிவாசன், சில வாரங்களுக்கு முன்பு வரை தி.மு.க-விற்கு ஆதரவான நிலைப்பாட்டையே வெளிப்படுத்தி வந்தார். தற்போதும் தனது புதிய கட்சி அறிவிப்புக்கு நடுவே, “தி.மு.க ஆட்சியில் மக்கள் முன்னேற்றம் அடைந்துள்ளனர்; அடுத்த முதலமைச்சர் ஸ்டாலின் தான்” எனக் கூறி தி.மு.க ஆதரவு நிலைப்பாட்டைத் தொடர்வது பலரையும் குழப்பத்தில் ஆழ்த்தியுள்ளது.

ஏற்கனவே பல்வேறு மோசடி வழக்குகளில் சிக்கி சர்ச்சைகளைக் கடந்தவர் பவர் ஸ்டார். தற்போது விஜய்யின் தவெக-விற்கு எதிராக இவர் குதித்திருப்பது சமூக வலைதளங்களில் விவாதங்களை கிளப்பியுள்ளது. தனது கட்சியின் பலத்தை அடுத்த தேர்தலில் நிரூபிப்போம் என்று அவர் சூளுரைத்துள்ள நிலையில், இது விஜய்யின் அரசியல் வருகைக்கு எதிரான ஒரு கிண்டலா அல்லது உண்மையான அரசியல் நகர்வா என்ற கேள்வி மக்களிடையே எழுந்துள்ளது.