தமிழ் சினிமாவில் வில்லன் நடிகர் என்றாலே உடனே பலருக்கும் நினைவுக்கு வருபவர் எம்என் நம்பியார் தான். எம்ஜிஆர் படங்களில் அவர் காட்டிய வில்லத்தனம் இப்போதும் ரசிக்க வைக்கிறது. ஆனால் அவர் உண்மையில் ஒரு தீவிர ஐயப்ப பக்தர். மது புகை பழக்கம் அறவே இல்லாதவர். மாமிசம் சாப்பிடாதவர். 50 ஆண்டுகளுக்கு மேலாக சபரிமலைக்கு யாத்திரை சென்றவர்.
இந்நிலையில் பல ஆண்டுகளுக்கு முன்பு ஒரு நேர்காணலில் நடிகர் எம்என் நம்பியார் இதுபற்றி பேசியிருக்கிறார். அதில் குருசாமி எம்என் நம்பியார் கூறியதாவது, என்னைப் பொறுத்த வரைக்கும் பக்தி தேவையில்லை. ஆனால் ஒழுக்கம் தேவை. ஒழுக்கம் கட்டுப்பாடு இருந்தால் ஒருவனுக்கு பக்தி தேவையில்லை. இதுதான் என்னுடைய கணிப்பு. கோவிலுக்கு போகணும் என்று நான் சொல்ல மாட்டேன். நான் போகிறேன். எனக்கு அதற்கு நேரம் ஒதுக்க முடியும். போகிறேன். விரதம் இருக்கிறேன். மனசை ஒருமுகப்படுத்த நாம முயற்சி பண்ணி அதுல ஓரளவு வெற்றி அடைந்தால் அதுதான் கோவில். நீங்க கோவிலுக்கு போக வேண்டிய அவசியமே இல்லை என்று எம்என் நம்பியார் அதில் கூறியிருக்கிறார்.