சென்னை ஓமந்தூரார் அரசு பன்னோக்கு உயர் சிறப்பு மருத்துவமனையின் நுழைவுவாயில் கான்கிரீட் பகுதி திடீரென இடிந்து விழுந்த விபத்தில், தாய் மற்றும் அவரது 7 வயது மகள் ஆகிய இருவர் படுகாயமடைந்துள்ளனர். மருத்துவமனைக்கு வந்திருந்தபோது எதிர்பாராதவிதமாக இந்த விபத்து நேரிட்டுள்ளது. இதில் தாயின் தலையில் பலத்த காயம் ஏற்பட்டதை அடுத்து, அவருக்கு உடனடியாகத் தையல் போடப்பட்டு அதே மருத்துவமனையில் உள்நோயாளியாகச் சிகிச்சைக்காக அனுமதிக்கப்பட்டுள்ளார். கட்டிட இடிபாடுகளுக்கு இடையே சிக்கிப் படுகாயமடைந்த அவரது 7 வயது சிறுமி, தற்போது மிகவும் ஆபத்தான நிலையில் தீவிர சிகிச்சைப் பிரிவில் அனுமதிக்கப்பட்டு மருத்துவர்களின் தீவிர கண்காணிப்பில் உள்ளார்.
இந்தக் கோர விபத்து குறித்துத் தகவல் அறிந்ததும், மருத்துவமனை உயர் அதிகாரிகளும் காவல்துறையினரும் சம்பவ இடத்திற்கு விரைந்து வந்து இடிபாடுகளை அகற்றும் பணியில் ஈடுபட்டனர். சென்னை நகரின் மையப்பகுதியில் உள்ள முக்கிய அரசு மருத்துவமனையின் நுழைவுவாயில் கான்கிரீட் பகுதியே இடிந்து விழுந்திருப்பது நோயாளிகள் மற்றும் பொதுமக்கள் மத்தியில் பெரும் அதிர்ச்சியையும் அச்சத்தையும் ஏற்படுத்தியுள்ளது. இந்த விபத்துக்கான காரணம் என்ன, கட்டிடப் பராமரிப்பில் ஏதேனும் குறைபாடுகள் இருந்ததா என்பது குறித்துப் பொதுப்பணித்துறை மற்றும் மருத்துவமனை நிர்வாக அதிகாரிகள் தீவிர விசாரணை மேற்கொண்டு வருகின்றனர்.