தருமபுரி மாவட்டம், அரூர் வட்டம் நவலை கிராமத்தைச் சேர்ந்த மகேந்திரன்-சொர்ணலதா தம்பதியருக்கு திருமணமாகி 10 ஆண்டுகள் ஆவதோடு, ஒரு மகனும் மகளும் உள்ளனர். கடந்த ஒரு வருடமாக மகேந்திரன் கோவையில் கூலி வேலை செய்து வந்ததால், சொர்ணலதா குழந்தைகளுடன் தனியாக வசித்து வந்துள்ளார். இதனைப் பயன்படுத்திக் கொண்ட அதே ஊரைச் சேர்ந்த வசந்த் (32) என்ற வாலிபர், கடந்த சில மாதங்களாக சொர்ணலதாவுக்குத் தொடர்ந்து பாலியல் தொல்லை கொடுத்து வந்துள்ளார். இரவு நேரங்களில் கதவைத் தட்டுவது, அத்துமீறி நுழைய முயல்வது போன்ற செயல்களில் ஈடுபட்ட வசந்த்தை, கடந்த மாதம் சொர்ணலதா மிளகாய்பொடி தூவி விரட்டியடித்துள்ளார். இந்தத் தொல்லைகளால் தனக்கு ஏற்படும் மன உளைச்சல் குறித்து சொர்ணலதா தனது கணவரிடமும் தொலைபேசியில் கூறி வருந்தியுள்ளார்.
இப்படியான சூழலில், கடந்த 29-ம் தேதி மாலை சொர்ணலதா தனது வீட்டில் மர்மமான முறையில் உயிரிழந்து கிடந்துள்ளார். இதுகுறித்து உறவினர்கள் மூலம் தகவல் அறிந்த மகேந்திரன் பதறியடித்துக் கொண்டு கோவையிலிருந்து ஊருக்குத் திரும்பியுள்ளார். தனது மனைவியின் மரணத்தில், அவருக்குத் தொடர்ந்து பாலியல் தொல்லை கொடுத்து வந்த வசந்த்துக்குத் தொடர்பு இருக்கலாம் என வலுவாகச் சந்தேகித்த மகேந்திரன், இதுகுறித்து கம்பைநல்லூர் காவல் நிலையத்தில் புகார் அளித்துள்ளார். தனியாக இருந்த பெண் மர்மமான முறையில் உயிரிழந்த இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
மகேந்திரனின் புகாரைத் தொடர்ந்து கம்பைநல்லூர் போலீசார் இச்சம்பவத்தை சந்தேக மரணமாக வழக்குப் பதிவு செய்து விசாரணையைத் தொடங்கியுள்ளனர். சொர்ணலதாவின் உடலைக் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். மேலும், சொர்ணலதா பயன்படுத்திய மொபைல் போனைப் பறிமுதல் செய்து போலீசார் ஆய்வு செய்து வரும் நிலையில், முதற்கட்ட விசாரணையைத் தொடர்ந்து தலைமறைவாக உள்ள அல்லது குற்றம் சாட்டப்பட்ட வசந்தைக் கைது செய்து தீவிர விசாரணை நடத்த போலீசார் திட்டமிட்டுள்ளனர்.