உத்தரப் பிரதேச மாநிலம் ஃபரூக்காபாத் மாவட்டம் அகிம்லாபூர் கிராமத்தைச் சேர்ந்த அங்கித் குமார், இந்திய விமானப்படையில் ‘பிளையிங் ஆபீசராக’ தேர்வாகி வரலாற்றுச் சாதனை படைத்துள்ளார். இவரது தந்தை ராஜேஷ் சதுர்வேதி இந்திய ராணுவத்தில் 30 ஆண்டுகள் பணியாற்றி ஓய்வுபெற்றவர் என்பதால், அங்கித் குமாருக்கும் சிறுவயது முதலே ராணுவத்தில் அதிகாரியாக வேண்டும் என்ற கனவு இருந்தது. இதற்காகப் பலமுறை முயற்சி செய்தபோதிலும், ராணுவத்தின் மிகக்கடினமான தேர்வான எஸ்.எஸ்.பி நேர்முகத் தேர்வில் தொடர்ச்சியாக 12 முறை நிராகரிக்கப்பட்டார்.
இதனிடையே, இந்தியக் கடலோரக் காவல் படையில் உதவி கமாண்டன்ட் தேர்வில் அகில இந்திய அளவில் முதலிடம் பிடித்தபோதிலும், இந்திய விமானப்படையில் பிளையிங் பிரிவில் சேருவதையே தனது ஒரே லட்சியமாகக் கொண்டு தொடர்ந்து போராடினார். இறுதியில், தனது 13-வது முயற்சியில் வெற்றி பெற்று, ஹைதராபாத்தில் நடைபெற்ற பாசிங் அவுட் பரேடில் இந்திய பாதுகாப்புத் துறை அமைச்சர் ராஜ்நாத் சிங் முன்னிலையில் குடியரசுத் தலைவரின் அதிகாரப்பூர்வப் பணி ஆணையைப் பெற்று விமானப்படை அதிகாரியாகப் பொறுப்பேற்றுக் கொண்டார். இவரது இந்தத் தளராத முயற்சி நாடு முழுவதும் உள்ள இளைஞர்களுக்குப் பெரும் தூண்டுதலாக அமைந்துள்ளது.